Fövqəladə Hallar Nazirliyinin (FHN) Dövlət Yanğın Nəzarəti Xidməti müşavirə keçirib, insanların kütləvi toplaşdığı obyektlərin yanğına qarşı vəziyyəti müzakirə olunub.
Bu barədə Ednews-a FHN-in Mətbuat xidmətindən məlumat verilib.
Bildirilib ki, müşavirə Dövlət Yanğın Nəzarəti Xidmətinin 3-cü ərazi Dövlət yanğın nəzarəti idarəsinin xidməti sahəsinə daxil olan Bakı şəhərinin Xətai, Nizami və Nərimanov rayonlarının ərazisində yerləşən mühüm əhəmiyyətli, təhlükə potensiallı obyektlərdə, həmçinin yaşayış sektorunda yanğın təhlükəsizliyinin etibarlı təmin edilməsi, eyni zamanda qarşıda duran vəzifələr və onların həlli yollarının müzakirəsi məqsədilə təşkil olunub.
Tədbirdə FHN-in Dövlət Yanğın Nəzarəti Xidmətinin şöbə rəisi daxili xidmət polkovniki Cəmil Xudiyev, Bakı şəhəri, Nərimanov Rayon İcra Hakimiyyəti başçısının birinci müavini Zaur Hüseynov, Xətai Rayon İcra Hakimiyyəti başçısının müavini Etibar Əhmədov, Nizami Rayon İcra Hakimiyyəti başçısının müavini İldırım Mehdiyev, “Azərişıq” ASC və “Azəriqaz” İB-nin məsul əməkdaşları, rayon polis şöbələrinin nümayəndələri, inzibati ərazi dairələri üzrə nümayəndəliklərin rəhbər şəxsləri, bələdiyyə sədrləri və iri sahibkarlar iştirak ediblər.
Müşavirədə məişət və istehsalat tullantılarının qanunsuz yığıldığı ərazilərin təmizlənməsi, nasaz yanğın su hovuzlarının və hidrantlarının bərpası, mühüm əhəmiyyət kəsb edən, eyni zamanda təhlükə potensiallı müəssisələrin, yaşayış binalarının, eləcə də insanların kütləvi toplaşdığı obyektlərin yanğına qarşı vəziyyəti müzakirə olunub, nöqsan və pozuntular diqqətə çatdırılıb və problemlərin aradan qaldırılması ilə bağlı aidiyyəti təşkilatlara müvafiq tapşırıqlar verilib.
Müşavirədə COP29 ərəfəsində yanğın təhlükəsizliyinin etibarlı təmin edilməsi məqsədilə qarşılıqlı fəaliyyətin gücləndirilməsi ilə əlaqədar zəruri tədbirlərin görülməsinə dair planlar müzakirə edilib.
