1991–1993-cü illər Azərbaycan dövlətçilik tarixinin ən mürəkkəb və böhranlı mərhələlərindən biri kimi xarakterizə olunur.
Həmin dövrdə ölkədə siyasi sabitlik pozulmuş, iqtisadi tənəzzül dərinləşmiş, dövlət institutları zəifləmiş və torpaqların işğalı prosesi genişlənmişdi.
Millət vəkili Hikmət Babaoğlu EDnews-a müsahibəsində 15 İyun – Milli Qurtuluş Gününün tarixi əhəmiyyətindən və onun Azərbaycanın gələcək inkişafına təsirindən danışıb.
Millət vəkili bildirib ki, 1991–1993-cü illərdə Azərbaycanda dövlətçiliyi ayaqda saxlayan əsas komponentlər – ideologiya, mənəvi dəyərlər, iqtisadi mexanizmlər və milli birlik ciddi sınaqlarla üz-üzə qalmışdı.
Onun sözlərinə görə, həmin dövrdə Ermənistanın hərbi təcavüzü nəticəsində Azərbaycan torpaqları işğala məruz qalır, ölkədə isə daxili siyasi qarşıdurmalar dərinləşirdi:
“Azərbaycan xalqı həmin mərhələdə dövlətçilik şüuru ilə hərəkət etməli və düzgün seçim etməli idi. Tarix göstərdi ki, xalqımız bu seçimi edə bildi və Heydər Əliyevi hakimiyyətə dəvət etməklə ölkənin gələcək inkişaf istiqamətini müəyyənləşdirdi”.
Hikmət Babaoğlu qeyd edib ki, Azərbaycan cəmiyyətində Heydər Əliyevə formalaşan etimad təsadüfi deyildi:
“Azərbaycan xalqı Heydər Əliyevin 1969–1982-ci illərdəki fəaliyyətini, ölkənin inkişafına verdiyi töhfələri görmüşdü. Həmin dövrdə Azərbaycanda sənaye, kənd təsərrüfatı və sosial infrastruktur sahəsində mühüm inkişaf baş verdi. Eyni zamanda milli kimliyin qorunması istiqamətində vacib addımlar atıldı”.
Millət vəkilinin sözlərinə görə, xüsusilə 1978-ci ildə Azərbaycan dilinin konstitusion səviyyədə dövlət dili kimi təsbit edilməsi mühüm siyasi hadisə idi.
O bildirib ki, 1993-cü ildə ölkədə yaranmış mürəkkəb vəziyyət – siyasi böhran, vətəndaş qarşıdurması təhlükəsi və torpaq itkiləri Azərbaycan xalqını tarixi qərar qəbul etməyə vadar etdi:
“Azərbaycan xalqı Heydər Əliyevə üz tutdu və sonrakı dövr göstərdi ki, bu seçim ölkənin dövlət müstəqilliyinin möhkəmləndirilməsinə xidmət etdi”.
Hikmət Babaoğlu vurğulayıb ki, sonrakı illərdə Azərbaycanda iqtisadi inkişaf təmin olundu, dövlət institutları gücləndirildi, xarici siyasət strategiyası formalaşdırıldı və ictimai-siyasi sabitlik yaradıldı.
Millət vəkili bu prosesi 2020-ci ildə əldə olunan tarixi qələbə ilə əlaqələndirərək qeyd edib:
“Əgər 1993-cü ildən başlayaraq baş verən proseslərə bütöv şəkildə baxsaq, görərik ki, bu dövr Azərbaycan dövlətinin möhkəmlənməsi və torpaqların azad olunmasına aparan mərhələnin formalaşması idi. Bu mənada Qurtuluş Günü həm də gələcək uğurların əsasının qoyulduğu tarixdir”.
Sonda Hikmət Babaoğlu qeyd edib ki, Qurtuluş fəlsəfəsi gələcək nəsillərə ötürülməli və dövlətçilik düşüncəsinin əsas istiqamətlərindən biri kimi daim təbliğ olunmalıdır.
