ABŞ Prezidenti Donald Tramp Venesuelada “Tren de Aragua” cinayətkar qruplaşmasının lideri Niño Guerreroya qarşı əməliyyat keçirildiyini bildirib.
EDnews xəbər verir ki, Tramp bu barədə sosial şəbəkə hesabında açıqlama yayıb.
ABŞ liderinin sözlərinə görə, əməliyyat onun göstərişi ilə ABŞ Cənub Komandanlığı tərəfindən həyata keçirilib.
“ABŞ Cənub Komandanlığı mənim göstərişimlə Venesuelada ‘Tren de Aragua’ təşkilatının lideri Niño Guerreroya qarşı ölümcül əməliyyat keçirdi və onu zərərsizləşdirdi”, - deyə Tramp qeyd edib.
O bildirib ki, əməliyyat Venesueladakı tərəfdaşlarla sıx koordinasiya şəraitində həyata keçirilib.
Trampın sözlərinə görə, “Tren de Aragua” üzvlərinin artıq nə Venesuelada, nə də başqa bir yerdə təhlükəsiz sığınacağı qalmayıb.
“Bu qatilləri və narkotik baronlarını harada olsalar, tapacağıq”, - deyə ABŞ Prezidenti vurğulayıb.
Qeyd edək ki, “Tren de Aragua” Latın Amerikasında fəaliyyət göstərən ən təhlükəli cinayətkar qruplaşmalardan biri hesab olunur. ABŞ administrasiyası daha əvvəl bu təşkilatı xarici terror təşkilatı kimi tanıyıb. ABŞ mətbuatının məlumatına görə, Niño Guerrero kimi tanınan Ektor Rustenford Guerrero Flores narkotik və insan alveri, reketçilik və digər ağır cinayətlərdə ittiham olunurdu.
