Venustrafobiya adlanan nadir psixoloji pozuntu səbəbindən bir kişi 55 il ərzində evdən çıxmayıb.
EDnews xəbər verir ki, CNN Türk-ün məlumatına görə, venustrafobiya insanların, xüsusilə də kişilərin, gözəl qadınlarla qarşılaşdıqda güclü qorxu, panika və narahatlıq hissi keçirməsi ilə xarakterizə olunan nadir fobiya növüdür.
Məlumata görə, bu fobiyadan əziyyət çəkən şəxs gözəl qadınlarla qarşılaşmaq qorxusundan uzun illər sosial həyatdan uzaq qalıb. O, evdən çıxmaqdan çəkinib, zəruri hallarda isə kənarda hər hansı qadınla rastlaşdıqda panik atak keçirib.
Mütəxəssislər bildirirlər ki, venustrafobiya adətən keçmiş travmatik hadisələr, aşağı özünəinam, rədd edilmə qorxusu və sosial narahatlıq pozuntuları ilə əlaqəli ola bilər. Bu vəziyyət ürək döyüntüsünün sürətlənməsi, tərləmə, nəfəs darlığı və güclü təşviş hissi ilə müşayiət oluna bilər.
Psixoloqlar qeyd edirlər ki, digər fobiyalar kimi, venustrafobiyanın da müalicəsi mümkündür. Koqnitiv-davranış terapiyası və psixoloji dəstək xəstələrin qorxularını nəzarət altına almasına və normal sosial həyata qayıtmasına kömək edə bilər.
