I, II, III və IV ixtisas qrupları üzrə qəbul imtahanının ikinci mərhələsinin ikinci cəhdində iştirak etmək üçün qeydiyyat başlanıb.
EDnews xəbər verir ki, bu barədə Dövlət İmtahan Mərkəzi məlumat yayıb.
Bildirilib ki, qeydiyyat 2026-cı il iyunun 1-dən iyunun 8-dək aparılacaq.
İmtahanın ikinci cəhdində iştirak etmək istəyən abituriyentlər şəxsi kabinetlərinin istifadəçi adı və parolundan istifadə etməklə DİM-in müvafiq internet səhifəsinə daxil olmalıdırlar. Onlar yenidən imtahan vermək istədikləri ixtisas qrupunu seçərək qeydiyyatdan keçməli və sistem tərəfindən göstərilən məbləği ödəməlidirlər.
Qeyd olunub ki, bəzi kateqoriyadan olan Azərbaycan Respublikası vətəndaşlarının imtahanda iştirakı dövlət büdcəsinin vəsaiti hesabına həyata keçirilir. Bu kateqoriyaya Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin uşaqları, şəhid ailəsinin üzvləri, valideynlərini itirmiş və valideyn himayəsindən məhrum olmuş uşaqlar, məcburi köçkün statusu olan şəxslər, I və II dərəcə əlilliyi müəyyən edilmiş şəxslər, eləcə də sağlamlıq imkanları məhdud 18 yaşınadək uşaqlar daxildir.
Bu abituriyentlər barədə məlumat DİM tərəfindən müvafiq icra orqanlarının informasiya sistemlərindən elektron qaydada əldə olunur.
DİM-in məlumatına görə, imtahanda yalnız göstərilən tarixlərdə qeydiyyatdan keçmiş abituriyentlər iştirak edə biləcəklər.
Abituriyentlərə ikinci imtahana qeydiyyat zamanı birinci cəhddəkindən fərqli ixtisas qrupunu seçməyə də icazə verilir.
Mayın 3-də keçirilən Azərbaycan dili — dövlət dili kimi imtahanından qeyri-məqbul alan abituriyentlər də yay qəbul imtahanına qeydiyyatdan keçə bilərlər. Lakin həmin şəxslər iyunun 21-də keçiriləcək ikinci Azərbaycan dili imtahanından da qeyri-məqbul aldıqları halda müsabiqəyə buraxılmayacaqlar.
Qeyd edək ki, ali təhsil müəssisələrinə qəbul imtahanının ikinci mərhələsinin ikinci cəhdi II və III ixtisas qrupları üzrə iyulun 5-də, I və IV qruplar üzrə isə iyulun 12-də keçiriləcək.
III ixtisas qrupu üzrə həm DT, həm də TC altqrupunu seçən abituriyentlər üçün coğrafiya fənni üzrə əlavə imtahan da iyulun 12-də təşkil olunacaq.
.png)
.jpg)
.jpg)
