"2009-cu ilin 30 aprelində Azərbaycan Dövlət Neft Akademiyasının (ADNA) ikinci korpusunda baş vermiş terror aktı, yalnız Azərbaycan xalqı üçün deyil, bütün bəşəriyyət üçün ağır zərbə olmuşdur. Bu faciə, təkcə hansısa universitetin təhsil mühitini deyil, insanlıq dəyərlərinə qarşı yönəlmiş hücum idi".
“EDnews” xəbər verir ki, bu fikri Beynəlxalq Avrasiya Mətbuat Fondunun Prezidenti Umud Mirzəyev "ADNA Terroru"-nun 16-cı ildönümü ilə bağlı bildirib. "ADNA Terroru"-nun terrorizmin çirkin simasını bir daha göstərdiyini vurğulayan BAMF Prezidenti rəhbəri olduğu təşkilatın təkcə Azərbaycan ərazisində deyil, bütün dünyada terrorizmə qarşı mübarizədə prinsipial mövqe tutduğunu bir daha vurğulayıb:
"ADNA-da baş vermiş bu dəhşətli terror aktı, sadəcə həyatını itirən və yaralananların faciəsi deyil, həm də ölkənin gələcəyinə vurulmuş ciddi zərbə idi. Təhsil, hər bir cəmiyyətin gələcəyinin qurulduğu yerdir və bu cür cinayətlər təhsilin müasir dünyadakı rolunu və əhəmiyyətini daha da artırır. Təhsil ocaqlarına qarşı həyata keçirilən terror aktları, cəmiyyətin inkişafına, dövlətin gücünə və əslində insanlığın gələcəyinə qarşı atılmış addımlardır.
Biz terrorizmə qarşı mübarizənin gücləndirilməsinin, beynəlxalq səviyyədə birgə fəaliyyət və əməkdaşlıq vasitəsilə mümkün olduğunu vurğulayırıq. Beynəlxalq hüquq və insan hüquqları çərçivəsində terrorizmin qarşısını almaq üçün dövlətlərarası əlaqələr daha da möhkəmləndirilməli, təcrübə mübadiləsi gücləndirilməlidir.
Vətəndaş cəmiyyəti də öz növbəsində Terrorizmə qarşı həmrəy olmalı, onun acı nəticələrinin təsirini azaldılmağı üçün maarifləndirmə işləri aparmalı, bununla bağlı layihələr təşkil etməlidir".
Azərbaycan xalqının bu faciənin qurbanlarını unutmadığını da qeyd edən BAMF Prezidenti əlavə edib:
"ADNA Terrorundan əldə olunan acı təcrübə, təkcə Azərbaycan üçün yox, dünyadakı hər bir dövlət üçün dərs olmalıdır. Hər bir dövlət və beynəlxalq təşkilat, bu istiqamətdə daha fəal olmalı, terrorizmin hər cür formasına qarşı birgə mübarizə aparmalıdır. Bu, təkcə bəşəriyyətin gələcəyini qorumaq yox, həm də insanlıq dəyərlərinin təmin edilməsi üçün vacibdir. ADNA terrorunun 16-cı ildönümü, həm də bir çağırışdır: "Terrorizmə qarşı mübarizə yalnız bir ölkənin yox, bütün dünyanın məsuliyyətidir."
P.S. Sonda, “ADNA Terroru”-nun qurbanlarını dərin hüznlə yad edir, onların ailələrinə səbr diləyirik. Allah rəhmət eləsin!
