“Rusiya Ermənistanın suverenliyini ləğv etmək, Robert Köçəryan, II Qaregin və Serj Sərkisyan kimi marionetləri vasitəsilə bizi quberniyaya çevirmək istəyir. Moskva onların qarşısına bu vəzifəni qoyub”.
“EDnews” xəbər verir ki, bunu erməni din adamı, bütün ermənilərin katolikosu II Qareginin keçmiş köməkçisi Xoren Ovannisyan deyib.
“Serj Sərkisyan və Robert Köçəryan bu gün vəzifədə deyillər, limitsiz pulları, təsir rıçaqları və media qurumları olsa da, çevriliş edib öz marionetlərini hakimiyyətə gətirə bilmirlər. Onların son ümidləri bu üçbaşlı yırtıcı Ktriç Nersisyandır (II Qaregin). Bu yırtıcı ölkəmizin inkişafına imkan vermək istəmir. Robert Köçəryan və Serj Sərkisyan artıq iki dəfə hərbi çevriliş edib: 27 oktyabr və 1 martda qanımızı töküblər, Ktriç Nersisyan isə ermənilərin tökülən qanına xeyir-dua verib.
Moskvanın da ümidi bu qocayadır, amma bir ildir çaxnaşmalar, təlatümlər olur, bacarmırlar.
Yarımcan Samvel Karapetyan da göndərildi ki, gəlsin, birləşsinlər və işlərini görsünlər. Bu, “Ruben Vardanyan 2” layihəsi idi”.
Ovannisyanın sözlərinə görə, Rusiya vaxtilə Ruben Vardanyanı Qarabağa Ermənistanda hakimiyyət dəyişikliyinə nail olmaq üçün göndərsə də, bu planı baş tutmayıb.
Din adamı II Qareginin vaxtilə SSRİ KQB-sinə, bu gün isə Rusiya kəşfiyyatına işlədiyini vurğulayıb:
“Mən dəfələrlə demişəm, indi də təsdiq edirəm ki, II Qaregin Rusiya xüsusi xidmət orqanlarının agentidir, ölkəmizə göndərilmiş “Troya atı”dır və bu gün onun vasitəsilə şimal qonşumuz ölkəmizə zərbələr endirməyə çalışır.
Bir neçə ay əvvəl müxtəlif platformalarda bəyan etmişdim ki, o, 1979-cu ildə Almaniyadan agent kimi ifşa olunaraq Moskvaya əli qandallı deportasiya edilib. Mən bəyan etmişəm ki, Ktriç Nersisyan məni buna görə məhkəməyə verə bilər. Amma mən onun deportasiya olunduğunu sübut etmək üçün məhkəməyə müraciət edəcəyəm.
Üstəlik, 2005-ci ildə Almaniyadakı erməni icmasının liderindən dəvət alaraq Almaniyaya getmək və o vaxtkı kansler Angela Merkellə görüşmək istəyib. Bunu eşidər-eşitməz Merkel görüşdən imtina edib. Həmin məktublar indi həm Almaniyada, həm də Eçmiədzindədir. Qaregin qorxur və səfər proqramını ləğv edir. Bütün dəlillər əlimdədir”.
