"Apple" şirkəti altı ildən sonra ilk dəfə olaraq əsas "iPhone" modelinin ekran ölçüsünü artırmağa hazırlaşır.
“EDnews” xəbər verir ki, "Digital Chat Station" tərəfindən yayılan və etibarlı hesab olunan insayder məlumata görə, "iPhone 17" modelində ekran 6,1 düymdən 6,3 düymə qədər böyüyəcək.
Qeyd edək ki, oxşar dəyişiklik 2024-cü ildə "iPhone 16 Pro" modelində də tətbiq olunmuşdu. Bu artım əsasən çərçivələrin daha incə dizaynı sayəsində mümkün olmuşdu və gözləntilərə görə, "iPhone 17" modelində də oxşar yanaşma tətbiq olunacaq.
"Apple" sonuncu dəfə əsas modelin ekranını 2019-cu ildə, "iPhone 11"də böyütmüşdü – o zaman ölçü 5,8 düymdən 6,1 düymə çatdırılmışdı.
"iPhone 17" seriyasının gözlənilən ölçüləri belə olacaq:
* iPhone 17 – 6,3 düym
* iPhone 17 Air (Slim) – 6,6 düym
* iPhone 17 Pro – 6,3 düym
* iPhone 17 Pro Max – 6,9 düym
Əsas modelə 120 Hz - lakin məhdud
"iPhone 17"də həmçinin 120 Hz yeniləmə tezliyi gözlənilir. Lakin bu "ProMotion" texnologiyası olmayacaq – yəni adaptiv tezlik və "Always-On Display" funksiyaları olmayacaq. Bu da əsas modellə Pro modellər arasında fərqin qorunacağı deməkdir.
"iPhone 17"nin təqdimatı ənənəvi olaraq sentyabr ayında baş tutacaq. Həmin təqdimatda iOS 26 əməliyyat sisteminin də yeni şüşə dizaynla təqdim olunacağı gözlənilir. "Apple" bu yeniləməni son 11 ilin ən böyük dəyişikliklərindən biri adlandırır.
İddialara görə, "Apple" 2025-ci ildən etibarən "iPhone" dizaynını hər il dəyişməyi planlaşdırır. Bu il arxa kamera modulu, 2026-cı ildə ön panel, 2027-ci ildə isə daha radikal dəyişikliklər gözlənilir.
