Türkiyənin Qars şəhərindəki Qafqaz Universitetində “Anadoluda erməni cinayətləri barədə dünya ictimaiyyətinin məlumatlandırılmasında gənclərin rolu” mövzusunda inşa müsabiqəsinin qaliblərinin mükafatlandırılması mərasimi keçirilib.

 “EDnews” xəbər verir ki , tədbiri Qars Əsassız Erməni İddiaları ilə Mübarizə Cəmiyyəti təşkil edib və mükafatlandırma mərasimi Türkiyə universitetinin fakültələrindən birinin binasında baş tutub.

Tədbirdə çıxış edən Qafqaz Universitetinin İctimai Elmlər İnstitutunun direktoru, professor Yaşar Kop tədbir iştirakçılarının diqqətini Osmanlı imperiyasının son illərində baş verən faciəli hadisələrə yönəldib.

Onun sözlərinə görə, erməni quldur dəstələrinin Anadolunun müxtəlif bölgələrində törətdiyi təxribatçılıq fəaliyyəti və qanlı cinayətləri Osmanlı hökumətini erməniləri dövlətin başqa ərazilərinə köçürmək qərarını qəbul etməyə məcbur edib.

Professor əlavə edib: “Xaricdəki ermənipərəst dairələr bu gün tarixi təhrif edərək, həmin dövrdə baş verən hadisələrdən Türkiyəyə təzyiq vasitəsi kimi istifadə etməyə çalışırlar. Bu yalançı təbliğatın ifşa olunmasında ölkəmizin hüquq və mənafeləri uğrunda mübarizənin önündə getməli olan gənclərin üzərinə böyük vəzifə düşür. Erməni gəncləri türklərə nifrət hissi ilə yetişdirilir, biz isə onların tarixi həqiqətləri bilməsinə çalışmalıyıq”.

Qars Əsassız Erməni İddiaları ilə Mübarizə Cəmiyyətinin rəhbəri Mehmet Tekel də ermənilərin Anadoludakı cinayətlərindən danışıb. O, Şərqi Anadoluda ermənilər tərəfindən onlarla müsəlman kəndinin, məscid və qəbiristanlığın dağıdılmasına dair təkzibolunmaz arxiv sübutlarının mövcudluğuna işarə edib.

M.Tekel Qarsda Türk Xalqlarının Soyqırımı Muzeyinin yaradılması təşəbbüsü ilə çıxış edib.

Azərbaycanın Qarsdakı baş konsulu Zamin Əliyev, öz növbəsində, regionun tarixi mövzusunda tədbirlərin təşkilinin vacibliyini vurğulayıb və gəncləri keçmişdən dərs almağa çağırıb.

Tədbirdə Qafqaz Universitetinin rektoru vəzifəsini icra edən professor Selçuk Ural, Türkiyədə fəaliyyət göstərən siyasi partiyaların və ictimaiyyətin nümayəndələri iştirak ediblər.

Fatimə Mərdanlı //EDnews