Bir neçə gün əvvəl Rusiyanın KİV-lərində Politoloq, Rusiya Federasiyası İctimai Şurası nəzdində Koordinasiya Şurasının üzvü Vladimir Karasev Azərbaycan Respublikasının siyasəti, həmçinin Prezidenti İlham Əliyev haqqında təhqiramiz fikirləriylə gündəmə gəlmişdi. Azərbaycan cəmiyyəti tərəfindən tənqidlərə tuş gələn fikirlərə ölkənin aparıcı QHT-lərindən biri olan Beynəlxalq Avrasiya Mətbuat Fondunun vitse-prezidenti belə münasibət bildirib:
Azərbaycan prezidenti cənab İlham Əliyevin apardığı uğurlu xarici siyasət bu gün Azərbaycanın nəinki regionda o cümlədən qlobal səviyyədə nüfuzunun artmasına və güclənməsinə səbəb olub. Xüsusən, İkinci Qarabağ Zəfəri, son illər artan beynəlxalq əməkdaşlıqlar, mötəbər tədbirlərə ev sahibliyi və son olaraq COP29 kimi dünya əhəmiyyətli bir tədbirin uğurla həyata keçirilməsi bunun bariz nümunəsidir. Görünən odur ki, Azərbaycanın inkişafı, artan nüfuzu anti-Azərbaycan qüvvələrini narahat etməkdədir.
Son günlərdə özünü siyasi şərhçi adlandıran Vladimir Karasevin açıqlamalarına nəzər yetirsək onun da sözügedən qüvvələrdən heç bir fərqinin olmadığını və hansı xislətdə olduğunu görə bilərik. Çox təəssüf ki, bu cür etik dəyərlərə sahib olmayan Karasev kimi ünsürlərin qeyri-etik ifadələrinin Rusiya mətbuatında yayımlanmasına şərait yaradılır. Məsələ ilə bağlı rəsmi Kremlin münasibətinə gəldikdə isə, tarixə nəzər salsaq biz hər zaman Rusiyanın Azərbaycanla bağlı obyektiv informasiyaların yayılmasında maraqlı olmadığının şahidi olmuşuq. Baş verən son Azərbaycan Hava Yollarının təyyarə qəzası zamanı da Rusiya mətbuatının əsassız və cəfəng iddialar ilə reallıqları ört basdır etmək cəhdləri elə rəsmi Kremlin mövqeyidir.
