.png)
Müdafiə Nazirliyinin Baş Tibb İdarəsinin rəis müavini vəzifəsindən azad edilən polkovnik Oktay Babayev barəsində cinayət işi başlanıb.
EDnews “Qafqazinfo”ya istinadən xəbər verir ki, sabiq vəzifəli şəxs dələduzluqda ittiham olunur.
Məlumata görə, cinayət işi üzrə zərərçəkmiş şəxs Silahlı Qüvvələrin Baş Klinik Hospitalının Mərkəzi Tibbi Arxivinin və Müdafiə Nazirliyinin Tibbi Sənədlər Arxivinin sabiq rəisi, hazırda korrupsiya ittihamı ilə həbsdə olan mayor Ruhin Tağıyevdir.
İttihama əsasən, Oktay Babayev Ruhin Tağıyevdən onun sərəncama göndərilməməsinə köməklik göstərəcəyi vədi ilə 30 min manat alıb. Lakin bir müddət sonra R.Tağıyev həbs olunub.
Şikayət əsasında Respublika Hərbi Prokurorluğunda istintaq aparılıb. İstintaqın yekununda O.Babayevə Cinayət Məcəlləsinin 178.2.3-cü maddəsi ilə ittiham irəli sürülüb. Həmin maddə qulluq mövqeyindən istifadə edilməklə törədilən dələduzluq hallarını nəzərdə tutur. Maddənin sanksiyasında cərimə və ya 5 ilədək azadlıqdan məhrumetmə cəzası müəyyən edilib.
Əvvəllər Naxçıvan Hərbi Polis İdarəsinin rəisi vəzifəsində də çalışmış polkovnik Babayev 30 min manatın bir hissəsini ödəməyə razılıq verdiyi üçün həbs edilməyib. Onun barəsində alternativ qətimkan tədbiri seçilib.
Hazırda cinayət işi baxılması üçün Bakı Hərbi Məhkəməsinə göndərilib.
Qeyd edək ki, Ruhin Tağıyevin cinayət işi də Bakı Hərbi Məhkəməsində araşdırılır. Həmin iş üzrə hələlik hökm çıxarılmayıb.
.png)
