Yetkin insanların gün ərzində 500 qramdan çox qarpız yeməməsi tövsiyə olunur. Bir dəfəyə qəbul edilən optimal porsiya isə 200-250 qram hesab edilir.
EDnews "TASS"a istinadən xəbər verir ki, bu barədə Rusiya Həkimlər Cəmiyyətinin vitse-prezidenti, tibb elmləri doktoru Erik Prazdnikov məlumat verib.
Ekspertin sözlərinə görə, sağlam yetkin şəxslər qarpızı hər dəfə 200-250 qram olmaqla, gün ərzində maksimum 400-500 qram həcmində qəbul etməlidirlər.
“Bu miqdar orqanizmin qarpızın faydalarından yararlanmasına imkan verir və eyni zamanda xoşagəlməz simptomların yaranma riskini azaldır”, – deyə Prazdnikov bildirib.
Mütəxəssis erkən yetişən qarpızların mütləq yüksək miqdarda nitrat ehtiva etməsi barədə yayılan fikirlərin doğru olmadığını da qeyd edib. Onun sözlərinə görə, becərmə qaydalarına əməl edilmədikdə mövsümün istənilən dövründə qarpızda nitrat səviyyəsi yüksək ola bilər.
Əksinə, erkən idxal edilən və ya istixana şəraitində yetişdirilən qarpızlar bütün sanitariya normalarına cavab verə bilər.
Prazdnikov bildirib ki, yerli qarpız almaq üçün ən uyğun dövr iyulun sonu və avqust ayıdır. Yayın əvvəlində satışda olan qarpızların əksəriyyəti idxal məhsulları olur və onların keyfiyyəti istehsalçıdan asılıdır.
Ekspert qarpız seçərkən yol kənarında satılan, çatlamış və ya dərin əzikləri olan meyvələrdən uzaq durmağı məsləhət görüb. Onun sözlərinə görə, keyfiyyətli qarpızın saplağı adətən quru olur, üzərinə vurulduqda aydın səs çıxarır və torpaqla təmas edən hissəsində ağ deyil, krem-sarı rəngli ləkə görünür.
Qarpız yeməzdən əvvəl qabığının yaxşıca yuyulması da vacibdir. Doğranmış qarpız yalnız soyuducuda saxlanılmalı və 1-2 gün ərzində istehlak edilməlidir.
Qarpızın iç hissəsində turş qoxu, köpüklənmə və ya dad dəyişikliyi müşahidə olunarsa, onu yemək tövsiyə edilmir.
.jpg)
