ABŞ qüvvələrinin İranın cənub-şərqində yerləşən Kirman əyalətinə endirdiyi hava zərbəsi nəticəsində iki nəfər yaralanıb.
EDnews “Mehr” xəbər agentliyinə istinadən xəbər verir ki, bu barədə Kirman əyaləti qubernatorunun müavini Rəhman Cəlali məlumat verib.
Onun sözlərinə görə, hücum zamanı əyalətin cənubundakı dağlıq ərazidə yerləşən telekommunikasiya qülləsi hədəfə alınıb.
“Rabitə qülləsinə endirilən zərbə nəticəsində iki nəfər yaralanıb. Xilasetmə xidmətləri hadisə yerinə operativ şəkildə cəlb olunub. Yaralılar helikopterlə tibb müəssisəsinə təxliyə edilərək tibbi yardımla təmin olunublar”, – deyə Cəlali bildirib.
ABŞ Mərkəzi Komandanlığının açıqlamasına görə, Amerika qüvvələri iyulun 12-nə keçən gecə İran ərazisində çoxsaylı hədəflərə zərbələr endirib. Vaşinqton əməliyyatın İranın Hörmüz boğazında ticarət gəmisinə hücumuna cavab olaraq həyata keçirildiyini bildirib.
İran isə buna cavab olaraq Yaxın Şərqdə yerləşən ABŞ obyektlərinə raket və pilotsuz uçuş aparatları ilə hücumlar təşkil etdiyini açıqlayıb.
Bəhreyn, Küveyt, Birləşmiş Ərəb Əmirlikləri, Oman və Qətər də İran istiqamətindən buraxıldığı bildirilən hava hədəflərinin qarşısının alındığını bəyan ediblər.
Qeyd edək ki, ABŞ-nin son zərbələrinin Kirman şəhəri də daxil olmaqla İranın daha dərin bölgələrinə çatdığı barədə məlumatlar yayılıb. Hadisə ilə bağlı tərəflərin açıqlamalarının bir hissəsi müstəqil mənbələr tərəfindən hələ təsdiqlənməyib.
