Ermənistanda gələn il keçiriləcək parlament seçkisi yaxınlaşdıqca vəziyyət gərginləşəcək. Artıq həbslərin miqyası da genişlənib."

“EDnews” xəbər verir ki, bu fikirləri politoloq Elxan Şahinoğlu söyləyib.

O qeyd edib ki, baş nazir Nikol Paşinyan bir tərəfdən, radikal müxalifətlə, digər tərəfdən, kilsə ilə, bir də Rusiya tərəfindən öyrədilmiş hansısa dairələrin öyrətdiyi iş adamları ilə mübarizə aparmaq məcburiyyətindədir:

"Samvel Karapetyan da məhz ona görə həbs olunub ki, o, kilsə ilə birləşərək Paşinyanı devirmək yollarını axtarırdı. Ona görə də bu həbslərin sayının artacağı istisna deyil. Beynəlxalq aləmdə isə bu həbslərə reaksiya olmayacaq. Buna da səbəb odur ki, Paşinyan özünü qərbpərəst siyasətçi kimi qələmə verir, Qərbin müəyyən dairələrindən ona dəstək var. Məhz bu dəstəyə görə də həbslərə göz yumacaq".

E.Şahinoğlu vurğulayıb ki, Qərbin özü də, ABŞ olsun, Avropa dövlətləri olsun, Paşinyanın hakimiyyətdən getməsini istəmirlər:

"Onlar düşünürlər ki, Paşinyan hakimiyyətini itirsə, onun yerinə gələnlər Rusiya ilə ittifaqı gücləndirəcəklər. Bu isə Amerika və Avropanın maraqlarına cavab vermir. Həbslərə göz yummaqlarının səbəbi də elə budur. Halbuki başqa ölkələrdə, misal üçün Azərbaycanda, bu tip həbslər olanda Avropadakı dairələr bar-bar bağırırdılar, Azərbaycana təzyiq də baş verirdi. Ermənistana isə bu mənada heç bir təzyiq görmürük, çünki yoxdur. Bir az Rusiyada müəyyən narahatlıq var, onun da səbəbi həbs olunanların Rusiya ilə bağlılıqlarının olmasıdır. Ona görə də hesab edirəm ki, parlament seçkisi yaxınlaşdıqca Ermənistanda gərginlik artacaq".

Politoloqun sözlərinə görə, parlament seçkisi yaxınlaşdıqca Ermənistanda yalnız siyasi gərginliyin artması deyil, hətta çevriliş cəhdlərinin baş verə biləcəyi ehtimalı da az deyil:

"Çünki Paşinyanı seçki yolu ilə hakimiyyətdən uzaqlaşdıra bilməyən qüvvələr onu devirmək və hətta öldürmək istəyə bilərlər. Bu da onu deməyə əsas verir ki, getdikcə Ermənistanda xaosun miqyası artacaq".