İtaliyanın Rəqabət Qurumu ABŞ-nin elektrikli avtomobil istehsalçısı "Tesla", Çin şirkəti "BYD", Almaniyanın "Volkswagen" və tərkibində "Fiat", "Peugeot", "Citroen", "Opel" kimi markaları birləşdirən "Stellantis" şirkətlərinə qarşı iddia qaldırıb.  

"EDnews" xəbər verir ki, qurum "Tesla" və "Stellantis" də daxil olmaqla, dörd elektrikli avtomobil istehsalçısını ədalətsiz ticarət təcrübələrinə görə araşdırdığını bildirib.  

Ayrı-ayrı dörd istintaq çərçivəsində hədəfə alınan avtomobil istehsalçılarının İtaliya və Avropadakı törəmə şirkətləri olan "BYD Industria Italia", "Stellantis Europe", "Tesla Italy" və "Volkswagen Group Italia" araşdırılır.  

"AFP" xəbər agentliyinin məlumatına görə, İtaliyanın Rəqabət Qurumu açıqlamasında istintaqların istehlakçılara sürüş məsafəsi, batareyanın aşınması və batareya zəmanətindəki məhdudiyyətlərlə bağlı təqdim edilən məlumatlara aid olduğunu və bunların İtaliyanın istehlakçı hüquqlarını qoruma qanunlarını potensial olaraq pozduğunu vurğulayıb.  

Şirkətlərin internet saytlarında bazara çıxarılan elektrikli nəqliyyat vasitələrinin sürüş məsafəsi ilə bağlı ümumi və bəzən ziddiyyətli məlumatlar yer alır. Həmçinin, reklam edilən maksimum məsafəyə təsir edən amillərin nə olduğu və onların real məsafəyə hansı dərəcədə təsir etdiyi aydınlaşdırılmır.  

Bundan əlavə, internet saytlarında elektrikli avtomobil batareyalarının normal istifadə nəticəsində necə aşına biləcəyi və təqdim olunan zəmanətlərin məhdudiyyətləri barədə də kifayət qədər məlumat verilmədiyi bildirilir.  

Nəzarət qurumu cümə axşamı günü İtaliyanın maliyyə polisi ilə birlikdə adıçəkilən dörd şirkətdə yoxlamalar apardığını açıqlayıb.