Hər birimizə məlumdur ki, hazırda pensiya kapitalı tələbi 40 min 320 manatdır. Yəni vətəndaş yaşa görə əmək pensiyası almaq üçün ya bu məbləğdə kapitala, ya da 25 illik staja malik olmalıdır.

Bəs görəsən, vətəndaş fərdi hesabının sığorta hissəsində toplanmış pensiya kapitalından niyə könüllü formada istifadə edə bilmir? Kapital tələbi azaldıla və ya könüllü istifadə üçün hansısa şərtlər təklif edilə bilərmi? Biz niyə illərlə gözləməliyik ki, sonda bu kapitaldan istifadə edə bilək?

"EDnyus" xəbər verir ki,  Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov mövzu ilə bağlı Oxu.Az-a danışıb.

Ekspert bildirib ki, pensiya kapitalının formalaşdırılması və kapital tələbi ilə bağlı məsələlər büdcə müzakirəsində də diqqət mərkəzində olub:

"Kapitala diferensial yanaşma və pensiya kapitalından istifadə ilə bağlı da təkliflərimizi təqdim etmişik. Bir sıra ölkələrdə, o cümlədən, Sinqapurda, ABŞ-də olduğu kimi, pensiya kapitalının müəyyən hissəsinin daha tez istifadə olunmasını təklif edirik. Güman edirik ki, bu, bütövlükdə pensiya kapitalının daha səmərəli istifadəsinə imkan yarada bilər. Eyni zamanda, pensiya kapitalı ilə bağlı tələblərdə keyfiyyət meyarının nəzərə alınmasını təklif edirik. Nəzərə alaq ki, Azərbaycanda pensiya ilə bağlı amnistiya var. 2018-ci il iyulun 1-nə qədər hətta 1 manat pensiya kapitalı olan vətəndaşlarımız 25 il staj və ya pensiya kapitalı olmadan əmək pensiyası almaq hüququna malik olurlar. Bu, ölkə başçısının tapşırığı ilə reallaşan, vətəndaşlarımızın sosial təminatının güclənməsinə xidmət edən ciddi bir amnistiyadır və artıq reallaşır. Bu kontekstdə amnistiyanın olması pensiyaya çıxış imkanlarını xeyli artırıb. Az yığımı olan və ya stajı olmayan vətəndaşlarımız da əmək pensiyası almaq hüququ qazanırlar. Amma bizim təklifimiz ondan ibarətdir ki, burada keyfiyyət meyarları nəzərə alınsın.

4 min və ya 40 min kapitalı olan vətəndaşlarımız eyni məbləğdə, yəni minimum məbləğdə pensiya alırlar. Təklifimiz ondan ibarətdir ki, vətəndaş tələb olunan kapitalın 50 faizdən çoxunu yığıbsa, 50 faizdən yuxarı olan hissə də pensiyada nəzərə alınsın. Hətta həmin vətəndaşın pensiya hüququ amnistiyaya düşsə belə, nəzərə alına bilər. Keyfiyyət meyarı ilə bağlı onu deyə bilərəm ki, çoxuşaqlı ailələr və ya tək olan analar üçün kapital tələbinin azaldılmasını təklif edirik. Bundan başqa, fərqli keyfiyyət meyarlarının tətbiqi də mümkündür. Bu da kapital tələbinin azaldılmasına və daha az kapital ilə nisbətən, diferensial olaraq və keyfiyyət meyarları nəzərə alınmaqla daha çox pensiya əldə edilməsinə imkan yarada bilər".