Almaniya ABŞ və Rusiya prezidentləri arasında başlayan danışıqlar fonunda Ukraynaya yardımını mümkün qədər tez artırmalıdır. Bunun üçün ölkə parlamenti Ukraynadakı müharibəni və onun Avropanın təhlükəsizliyinə təsirlərini fövqəladə vəziyyət kimi tanımalıdır.
"EDnyus" xəbər verir ki, bu barədə Almaniya kansleri Olaf Şolts bəyan edib.
"Bu o deməkdir ki, Ukraynaya dəstəyimiz, hansı ki, hazırda heç vaxt olmadığı qədər vacibdir, artıq dövlətimizin öz vətəndaşları qarşısında yerinə yetirməli olduğu digər vəzifələr hesabına həyata keçirilməyəcək", – deyə Şolts bildirib. O qeyd edib ki, Bundestaq Almaniya Əsas Qanununun 115-ci maddəsinin ikinci bəndinə uyğun olaraq fövqəladə vəziyyət elan edə bilər.
Şoltsun sözlərinə görə, Donald Tramp və Vladimir Putin arasındakı danışıqlar gözlənilməz deyildi, lakin bu, "Avropanın aydın, sürətli və qəti mövqe tutmasını tələb edir". Almaniya kansleri Trampın döyüş əməliyyatlarını mümkün qədər tez başa çatdırmaq istəyini dəstəklədiyini bildirib, lakin Almaniyanın "məcburi sülhü" heç vaxt qəbul etməyəcəyini də vurğulayıb. Onun fikrincə, Rusiyanın qələbəsi və Ukraynanın süqutu sülhə deyil, əksinə, "Ukraynadan çox-çox kənarda Avropada sülh və sabitliyin təhdid altına düşməsinə" səbəb olacaq.
"Bu gün reallığa açıq gözlə baxmalıyıq: ABŞ administrasiyasının addımları və bəyanatları Ukrayna, Avropa və dünya üçün nə deməkdir? Hərəkətsizlik Almaniyanın və qitəmizin təhlükəsizliyini risk altına atmaq demək olardı. Mən isə bu kritik anda ölkəmiz üçün buna imkan verməyəcəyəm", – deyə Şolts bəyan edib.
Almaniya ABŞ-dan sonra Ukraynaya ən çox silah tədarük edən ikinci ölkədir. Almaniya hökumətinin rəsmi nümayəndəsi Şteffen Hebeştaytın sözlərinə görə, Berlin Rusiyanın Ukraynaya tammiqyaslı müdaxiləsinin başlanğıcından bəri Kiyevə müxtəlif növ yardımlar üçün 44 milyard avro ayırıb. 2025-ci ildə ölkə büdcəsindən Ukraynanın hərbi dəstəklənməsi üçün daha 4 milyard avro ayrılması planlaşdırılır, lakin bu sənəd hələ hökumət tərəfindən təsdiqlənməyib.
Tramp ABŞ prezidenti kimi vəzifəsinin icrasına başladıqdan sonra 12 fevralda Putinlə ilk rəsmi telefon danışığını aparıb. Təxminən bir saat yarım davam edən söhbətdən sonra Tramp bildirib ki, Rusiya prezidenti ilə razılığa gəliblər və hər iki ölkənin komandaları "hərbi münaqişənin nizamlanması üzrə dərhal danışıqlara başlayacaqlar". Bloomberg-in məlumatına görə, Trampın Putinə zəng etməsi Aİ-dəki ABŞ müttəfiqlərini şoka salıb. Avropalı diplomatlardan biri Vaşinqtonun siyasətindəki dəyişiklikləri "Ukraynanın preventiv təslim olması" kimi qiymətləndirib.
İki prezidentin söhbəti barədə xəbərlər yayıldıqdan dərhal sonra Almaniya, Fransa, Polşa, İtaliya, İspaniya, Böyük Britaniya və Aİ-nin xarici işlər nazirləri birgə bəyanat verərək, danışıqlar masasında Avropanın da yer almasını tələb ediblər. Avropa diplomatiyasının rəhbəri Kaya Kallas isə ayrıca vurğulayıb ki, "Ukrayna ilə bağlı istənilən danışıqlarda Avropa əsas rol oynamalıdır".
