Bu günədək İtaliya Ukraynaya 2,5 milyard avro dəyərində humanitar, maliyyə, iqtisadi, eləcə də müdafiə yardımları göstərib.

EDnews xəbər verir ki, bunu İtaliya Baş nazirinin müavini, xarici işlər və beynəlxalq əməkdaşlıq naziri Antonio Tayani deyib.

O, 70 ildən sonra Avropa torpaqlarında müharibənin davam etdiyini bildirib.

“Rusiya-Ukrayna münaqişəsi üç ildən çoxdur davam etsə də, İtaliya bütün beynəlxalq tərəfdaşlarla birgə atəşkəsə, ədalətli və davamlı sülhə nail olmaq səylərini dəstəkləməkdə davam edir. Ukraynaya dəstək bizim təhlükəsizliyimiz və gələcəyimiz üçün prioritet olaraq qalır. Bizi əhatə edən böhran bölgələri avropalıların vərdiş etdiyi sabitlik və firavanlığa meydan oxuyaraq çoxalmaqda davam edir. İtaliya hökuməti olaraq, bizim səylərimiz sülhü təşviq etmək və münaqişələrin əhaliyə təsirini azaltmaqdır”, - deyə Antonio Tayani vurğulayıb.

Nazir Romanın ev sahibliyi edəcəyi Ukraynanın Bərpası Konfransının əhəmiyyətini də qeyd edib. Bildirib ki, bu, Ukraynanın yenidən qurulmasına həsr olunmuş ən mühüm illik beynəlxalq tədbirdir. Konfransda Ukrayna Təhsil və Elm Nazirliyi, Avropa Komissiyası və UNESCO-nun dəstəyi ilə İtaliyanın Universitetlər və Tədqiqatlar Nazirliyi tərəfindən irəli sürülən Ukraynada Elm, Tədqiqat və İnnovasiyalar üzrə Roma Bəyannaməsi təqdim olunacaq.