"Qalatasaray"ın "Bavariya"nın ulduz futbolçusu Leroy Saneni transfer etməsi alman futbol ictimaiyyətində geniş rezonans doğurub.

“EDnews” xəbər verir ki, mövzu ilə bağlı Almaniya millisinin sabiq futbolçusu Mixael Ballak milli üzvünün ünvanına sərt tənqidlər səsləndirib.

O, Sanenin "Qalatasaray"a keçid qərarını düzgün hesab etmədiyini bildirib:

"Leroy Sanenin "Qalatasaray"a transferi onun karyerası baxımından mənfi addımdır. O, çox yaxşı yaşdadır və hələ də ən yüksək səviyyəli klublarda oynaya biləcək durumdadır. Kaş ki, Türkiyə əvəzinə daha güclü liqalara üz tutardı, fərqli bir istiqamət seçərdi".

Ballak Sanenin oyun performansına da toxunaraq onun çatışmazlıqlarını da qeyd edib:

"O, möhtəşəm istedada malikdir, lakin onu dünya səviyyəsinə çatdıracaq əsas xüsusiyyətlər - diqqət, xarakter, işinə ciddi yanaşma hələ də çatışmır, məsuliyyətlə qərar vermə bacarığı yoxdur. Bir neçə dəfə komandasına qələbə qazandıracaq qolları vura bilmədi. O, hər şeyə sahib bir oyunçudur - sürət, texniki zəka, zamanlama, əla sol ayaq. Amma elə bir Sane də var ki, bəzən maraqsız, bəzən yönsüz görünür. Ola bilsin ki, bunu bilərək etmir, amma oyuna təsir edir", - deyə sabiq futbolçu qeyd edib.

Sonda Ballak, Sanenin "Bavariya"dan ayrılmasının səbəbini də açıqlayıb:

"Bavariya" ona yeni müqavilə təklif etdi, lakin bu dəfə daha aşağı maaşla. Klub artıq onu bəzi digər oyunçular qədər yüksək səviyyəli hesab etmirdi. Sane isə bunu qəbul etmək istəmədi və fərqli qərar verdi".