“Vətəndaşların Sosial Rifahı Naminə” İctimai Birliyinin sədr müavini Nədimə Rəhimli beynəlxalq platformada Azərbaycanı təmsil edib.

O, “Dəyişikliyə istiqamət verən QHT-lər: Qlobal Cənub QHT Platforması çərçivəsində Qlobal Cənubda Dayanıqlı İnkişaf Məqsədlərini (DİM) gücləndirmək” adlı panelin moderatoru kimi çıxış edərək, mövzu üzrə müzakirələrə rəhbərlik edib.

Tədbirdə Asiya, Afrika və Latın Amerikasından olan 7 müxtəlif ölkənin qeyri-hökumət təşkilatlarının nümayəndələri iştirak edib. Müzakirələr zamanı Qlobal Cənub ölkələrində sosial bərabərsizliyin azaldılması, təhsilə çıxış, ekoloji davamlılıq və qadınların hüquqlarının müdafiəsi kimi əsas DİM-lər üzrə görülən işlər və qarşıda duran çağırışlar müzakirə olunub.

Nədimə Rəhimli çıxışında Azərbaycanın bu istiqamətdə əldə etdiyi uğurlar, vətəndaş cəmiyyəti institutlarının proseslərdə fəal rolu və dövlət-QHT əməkdaşlığının gücləndirilməsi barədə məlumat verib. O, vurğulayıb ki, ölkəmizdə QHT-lər BMT-nin müəyyən etdiyi 17 Dayanıqlı İnkişaf Məqsədinin reallaşmasına öz töhfələrini verməkdədirlər:

"Minatəmizləmə münaqişədən sonrakı dövrdə təhlükəsiz yaşayış və dayanıqlı inkişaf üçün əsas şərtdir. Azərbaycan Prezidenti İlham Əliyev bu məsələni 18-ci Dayanıqlı İnkişaf Məqsədi kimi qlobal gündəliyə daxil etməyi təklif edib. Təşəbbüs vətəndaş cəmiyyəti, o cümlədən BAMF tərəfindən dəstəklənir və beynəlxalq səviyyədə təşviq olunur. BAMF bu istiqamətdə BMT və COP29 çərçivəsində mühüm tədbirlər həyata keçirib".