“Azərişıq” ASC və Medianın İnkişafı Agentliyinin birgə təşkilatçılığı ilə Zəngilana mediatur təşkil olunub.
"EDnyus" xəbər verir ki, “Azərişıq” ASC-nin 10 illik yubileyi ilə əlaqədar keçirilən mediatur çərçivəsində KİV nümayəndələri Zəngilan Elektrik Şəbəkəsinin Rəqəmsal İdarəetmə Mərkəzi ilə tanış olublar.
Qonaqlara yeni yaradılan mərkəzlə bağlı məlumat verilib. Bildirilib ki, Zəngilan Elektrik Şəbəkəsinin Rəqəmsal İdarəetmə Mərkəzinin açılışı ötən il oktyabrın 3-də Prezident İlham Əliyevin iştirakı ilə reallaşıb. Müasir texnologiya və avadanlıqlarla təchiz olunan mərkəzdə hər birinin gücü 2500 kV olan iki transformator, 35 və 0,4 kV-luq qapalı paylayıcı qurğular, idarəetmə, texniki və köməkçi otaqlar yerləşir. Mərkəzin elektrik təchizatı üçün 110/35/10 kilovoltluq “Zəngilan” yarımstansiyasından ikidövrəli yeraltı kabel xətləri çəkilib.
Daha sonra media nümayəndələrinin iştirakı ilə konfrans keçirilib. Əvvəlcə “Azərişıq” ASC-nin Mətbuat və ictimaiyyətlə əlaqələr idarəsinin rəisi Vaqif Mustafayev görülən işlər barədə məlumat verib. “Azərişıq” ASC-nin Tədris və İnnovasiyalar Mərkəzinin direktoru Araz Məmmədzadə çıxış edib və 2015-2025-ci illər ərzində “Azərişıq” ASC-nin keçdiyi inkişaf yoluna qısa nəzər salıb. Bildirib ki, qarşıya qoyulan əsas hədəflərdən biri işğaldan azad olunan ərazilərin elektrik şəbəkəsinin yenilənməsi idi. Cəmi bir ayda Şuşa şəhəri elektrik enerjisi ilə təmin olundu. Həmçinin digər regionlarda reallaşan “100 kənd” layihəsi əsasında 2023-cü ildə 140-dək, 2024-cü ildə 120-dən çox kənd və qəsəbələrdə şəbəkə xətləri yenilənib. 2025-ci ildə də bu layihə uğurla davam etdirilir. Konfransda “Azərişıq” ASC-nin 10 illik fəaliyyətini əks etdirən videoçarx da nümayiş olunub. Çıxışlar zamanı “Azərişıq” ASC sədrinin texniki məsələlər üzrə müşaviri Vüsal Qənbərov 10 illik fəaliyyəti dövründə qurumun əldə etdiyi nailiyyətlərdən bəhs edib. Bildirib ki, ölkə üzrə həyata keçirilən əsaslı təmir və yenidənqurma işləri çərçivəsində 10 ildə 20 min km uzunluğunda müxtəlif gərginlikli müasir elektrik veriliş xətləri çəkilib, 30 min km-ə yaxın mövcud elektrik verilişi xətləri yenisi ilə əvəz olunub, 40 ədəd müasir 110/35 kV-luq, 227 ədəd 35 kV-luq yarımstansiya inşa edilib, 7 min ədəd yeni transformator məntəqəsi quraşdırılıb. “Azərişıq” ASC çətin relyef və hava şəraitinə baxmayaraq, ölkənin bütün regionlarında elektrik təsərrüfatının yenilənməsi işlərini davam etdirir.
Media nümayəndələrinə elektron xidmətlər barədə məlumat verilib. Qeyd edib ki, 2017-ci illə müqayisədə “Azərişıq” ASC-nin “ASAN xidmət” mərkəzlərində 8 il ərzində vətəndaşlara göstərilən xidmətlərin sayı 8-dən 18-ə çatdırılıb. Əvvəl 7 prosedurla aparılan müraciətlər bu gün cəmi 2 prosedurla yekunlaşır. Nəticədə şəbəkəyə qoşulma müddəti 41 gündən 20 günə endirilib. Hazırda “Azərişıq” ASC-nin 15 elektron xidməti mövcuddur və bu xidmətlər vasitəsilə vətəndaşlar prosedurları onlayn şəkildə idarə edə bilirlər. Ötən il sahibkarlıq subyektlərinin 53.4%-i elektron şəkildə müraciət edib”.
Sonda çıxış edən “Azərişıq” ASC-nin Enerji Satışı Departamentinin İnformasiya Araşdırma İdarəsinin rəis müavini Rüstəm Quliyev 10 il ərzində ölkə üzrə enerji yığımı göstəricisinin 80%-dən 97,6%-ə yüksəldiyini deyib. Həmçinin qeyd edib ki, texniki itki göstəriciləri 13,9%-dən 8,5%-ə endirilib. Bu ilin sonunadək texniki itkilərin daha 0,2% azaldılaraq 8,3%-ə çatdırılması proqnozlaşdırılır. Həmçinin bu illər ərzində abonentlərin sayı 2 milyon 359 mindən 2 milyon 993 minə, quraşdırılan smart sayğacların sayı 386 mindən 1 milyon 120 minə yüksəlib. Bu gün işğaldan azad edilən ərazilərdə 4182-si əhali qrupu olmaqla 5097 abonent fasiləsiz və dayanıqlı elektrik enerjisi ilə təmin olunub. Çıxışlardan sonra media nümayəndələrini maraqlandıran suallar cavablandırılıb. Sonda qonaqlar Zəngilanın elektrik enerjisi ilə təminatı üçün çəkilən 35 kV-luq ÖİN-3 kabel xətti ilə tanış olublar. İstehlakçıların fasiləsiz və dayanıqlı elektrik enerjisi ilə təmin olunması, elektrik enerjisi itkilərinin minimuma endirilməsini hədəfləyən “Azərişıq” ASC ölkə üzrə yenidənqurma və əsaslı təmir işləri ilə yanaşı, həm də maarifləndirici tədbirlərin keçirilməsini davam etdirir.
