"Əgər şuşalılar məni öz deputatları seçsələr, çox xoşbəxt olacağam".
Ednews xəbər verir ki, bu sözləri Polad Bülbüloğlu "Yeni Zaman" saytına verdiyi müsahibəsində deyib.
O sonra bildirib ki, hazırda bu Rusiya-Azərbaycan münasibətləri müttəfiqlik səviyyəsinə yüksəlmişdir:
"Bakı və Moskva arasındakı münasibətlər bir çox mərhələdən keçmişdir, o cümlədən çətin mərhələlər də olmuşdur, hazırda bu münasibətlər müttəfiqlik səviyyəsinə yüksəlmişdir. Bu prosesdə Azərbaycan Respublikasının Rusiya Federasiyasındakı fövqəladə və səlahiyyətli səfiri Polad Bülbüloğlunun müəyyən rolu vardır. O, 18 ildir ki, Azərbaycanın maraqlarını Rusiyada təmsil edir. Bu gün biz cənab səfirlə əldə olunan nailiyyətlər, dezinformasiya ilə mübarizə və qarşıdan gələn parlament seçkilərində iştirakı haqqında danışırıq".
Məlum olduğu kimi, Moskvada Azərbaycanın və Rusiyanın Xarici İşlər Nazirlikləri arasında siyasi məsləhətləşmələrin növbəti raundu keçirilib, bu görüşdə əsas müzakirə olunan mövzular hansılar oldu?
- Həqiqətən də, məsləhətləşmələr baş tutub. Azərbaycan tərəfindən nümayəndə heyətinə Azərbaycanın Xarici İşlər nazirinin müavini Samir Şərifov rəhbərlik edirdi. O, bir neçə il ərzində bizim səfirliyimizdə müşavir kimi çalışıb. Rusiya tərəfindən isə görüşə Rusiya Xarici İşlər nazirinin müavini Mixail Qaluzin qatılıb. Görüşdə razılıqla vurğulanıb ki, iki ölkə liderləri arasında qarşılıqlı etimad əsasında qurulan yüksək səviyyəli siyasi dialoq ikitərəfli gündəmi formalaşdırır və dövlətlər arasında müttəfiqlik əməkdaşlığının əsasını təşkil edir. İki ölkə arasında siyasi məsləhətləşmələr çərçivəsində iqtisadi, ticarət, mədəni-humanitar, beynəlxalq və regional təşkilatlar və formatlar çərçivəsində əməkdaşlıq məsələləri, ikitərəfli hüquqi baza və müzakirə olunan layihələr də müzakirə edilib. Həmin gün Samir Şərifov və Rusiya Xarici İşlər nazirinin müavini Aleksandr Qruşko arasında görüş keçirilib. Görüş zamanı beynəlxalq və regional təhlükəsizlik məsələləri, həmçinin hər iki ölkənin iştirak etdiyi regional formatlar çərçivəsində əməkdaşlıq məsələləri ətrafında fikir mübadiləsi aparılıb. Bununla yanaşı, S.Şərifov və Rusiya Federasiyası Prezidentinin xüsusi nümayəndəsi, Xəzər dənizi məsələləri üzrə Rusiya nümayəndə heyətinin rəhbəri Mixail Petrakov arasında görüşdə Xəzər məsələləri üzrə əməkdaşlığın cari vəziyyəti və inkişaf dinamikası müzakirə olunub. Qeyd etmək istəyirəm ki, görüşlər dostluq münasibətlərinə və Azərbaycan-Rusiya müttəfiqlik əməkdaşlığı ruhuna uyğun olaraq etimad mühitində keçib.
Son vaxtlar sosial şəbəkələrdə məşhur şəxslər haqqında müxtəlif saxta məlumatlar yayılır. Təəssüf ki, bu mənfi tendensiya sizi də keçməyib. Sağlamlığınızla bağlı problemlərin olduğu barədə saxta xəbərlər yayıldı, halbuki görürük ki, şükürlər olsun, hər şey qaydasındadır. Bu “atmalar” haqqında nə deyə bilərsiniz?
- Təəssüf ki, hər şey belədir və bunun nə ilə əlaqəli olduğunu anlamaq çətindir. Təbii ki, artıq 18 yaşı olmayan hər bir insan kimi, məndə də müəyyən narahatlıqlar ola bilər, lakin bu saxta xəbərlərdə mənə aid edilənlərin heç biri məndə yoxdur. Sadəcə olaraq düşünə bilərəm ki, bu dezinformasiyanı yayanlar bu yolla məşhurlaşmağa və ya pul qazanmağa çalışırlar. Guya Azərbaycanda bir klinikada işləyən bir həkim mənim infarkt keçirdiyimi deyir. Hər kəsi sakitləşdirmək və ya məyus etmək istəyirəm (gülür) - mən heç vaxt infarkt keçirməmişəm, təzyiqdən əziyyət çəkməmişəm, bir sözlə, haqqımda yazılanlar yalandır. Bu, çox təhlükəli tendensiyadır, çünki söhbət insanların sağlamlığından gedir. Hələ yaxınlarda mənim səsimi saxtalaşdırdılar... bir sözlə, dələduzlar yatmır. II Şuşa Qlobal Media Forumunda bu barədə də söhbət getdi, bu məsələyə hörmətli Prezident İlham Əliyev də diqqət yetirdi. Həqiqətən də, məlumatın kütlələrə təsir gücü böyükdür və əgər bu məlumat dağıdıcı gücə malikdirsə və ya dezinformasiyadırsa, təsəvvür edin ki, onun istifadəsi nə ilə nəticələnə bilər.
Azərbaycan parlament seçkilərinə fəal hazırlaşır. Bu baxımdan soruşmaq istərdim ki, Qarabağın ürəyi olan Şuşa şəhərini parlamentdə təmsil etmək üçün deputatlığa namizədliyini irəli sürmək niyyətindəsinizmi? Axı, sizin atanız, SSRİ xalq artisti Bülbül (Murtuza Məşədi Rza oğlu Məmmədov) və sizin həyatınızın bir hissəsi bu şəhərdə keçib.
- Maraqlı sual verdiniz, demək olar ki, fikirlərimi oxudunuz. Parlament seçkilərinin keçirilməsi hər bir dövlət və xalqın həyatında çox ciddi və məsuliyyətli hadisədir. Təbii ki, ruhum ora çəkilir. Mən artıq üç dəfə “Xarıbülbül” festivalında iştirak etmişəm, dərin hörmətli İlham Əliyevə, Mehriban xanım Əliyevaya, Heydər Əliyev Fonduna, Mədəniyyət Nazirliyinə festivalın ənənələrini davam etdirdikləri üçün təşəkkür etmək istərdim. Əlbəttə ki, Şuşanın bu gün doğma Azərbaycanın qoynuna qayıtması Ali Baş Komandanın xidmətidir. Biz hamımız torpağımızın hər qarışını canı ilə müdafiə edən əsgərlərimizin qarşısında borcluyuq. Əgər şuşalılar məni Parlamentdə öz nümayəndələri kimi seçsələr, onların etimadını doğrultmaq üçün əlimdən gələni edəcəyəm. Şuşadan deputat olmaq böyük bir şərəfdir. Bu 30 il ərzində mədəniyyətimizin beşiyi olan Şuşanı geri qaytarmağı arzulayırdıq və bunu etdik. Bu gün əsas vəzifəmiz Qarabağın inkişafı və çiçəklənməsi üçün hər şeyi etməkdir.
Xəyal
