“Bu gün burada Azərbaycanın vətəndaş cəmiyyəti təşkilatlarının nümayəndələrini və dövlət xadimlərini bir arada görməkdən məmnunam və hər zaman bu cür təşəbbüslərin dəstəkçisi olan Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinə öz təşəkkürümü bildirirəm. Müstəqillik əldə etdikdən bu günə qədər hər ötən il Azərbaycan ən müxtəlif sahələrdə özünün inkişaf və tərəqqi dövrünü yaşamaqdadır. Azərbaycan vətəndaş cəmiyyəti də öz tarixi ənənələri ilə birlikdə ildən ilə daha da güclənərək müəyyən bir səviyyəyə çatmışdır”.
Ednews xəbər verir ki, bu sözləri Beynəlxalq Avrasiya Mətbuat Fondunun prezidenti Umud Mirzəyev Zəngilan rayonundakı Konqres Mərkəzində Qeyri-Hökumət Təşkilatlarına Dövlət Dəstəyi Agentliyi və Azərbaycan Milli QHT Forumunun birgə təşkilatçılığı ilə “Azərbaycan QHT-lərinin Əməkdaşlıq Forumu”nda çıxış edərkən deyib.
“Heç şübhəsiz ki, Azərbaycanın çətin və keşməkeşli günlərinin xilaskarı Heydər Əliyev müstəqil Azərbaycanın vətəndaş cəmiyyətinin də qurucusudur. Heydər Əliyev hakimiyyətə gəlişinin ilk illərindən demokratik prinsiplərin möhkəmləndirilməsi və vətəndaş cəmiyyətinin formalaşması üçün hüquqi bazanın yaradılmasına böyük diqqət yetirdi. Onun təşəbbüsü ilə qəbul edilən 1995-ci il Konstitusiyası, vətəndaşların hüquq və azadlıqlarının təminatına yönəlik bir çox qanunvericilik aktlarının qəbulunu təşviq etdi. Bu hüquqi çərçivə, vətəndaş cəmiyyəti təşkilatlarının sərbəst fəaliyyət göstərməsi və onların hüquqlarının qorunması üçün əsas təminat oldu.
Bu gün bizlər qalib Azərbaycanın və Azərbaycan cəmiyyətinin QHT nümayəndələriyik. Bəli, o QHT-lər ki, 30 illik işğal dövründə dayanmadan Azərbaycan həqiqətlərini dünyaya çatdırmaq üçün müxtəlif platformalarda, auditoriyalarda söz sahibi oldular. Bütün haqqsızlıqlara, ədalətsizliklərə baxmayaraq öz yollarından dönmədilər. İkinci Qarabağ müharibəsi zamanı yaranan birliyin əsas parçalarından oldular. Müharibədən sonraki dövrdə də bütün sahələrdə - təhsil, iqtisadiyyat, sosial, tibb, sülh quruculuğu, ətraf mühit və s. istiqamətlərdə fəaliyyətlər daha da gücləndi. 2022-ci ilin dekabrında başlayan eko-aksiya, mina xəritələrinin təqdim olunması üçün yaradılan petisiya, Azərbaycana tətbiq olunan qərəzli sanksiyalara qarşı birgə bəyanatlar, Metsamor atom elektrik stansiyasının fəaliyyətinə yönəlik etiraz çıxışları və s. çoxsaylı fəaliyyətləri nümunə çəkə bilərik. Bu il də QHT-lərin COP29 kimi vacib bir tədbirə ev sahibliyi edən Azərbaycana dəstək olmaq və faydalı təmsilçilik missiyaları vardır”.
U.Mirzəyev qeyd etdi ki, Beynəlxalq Avrasiya Mətbuat Fondu BMT-nin İqtisadi və Sosial şurasının Əsas məşvərətçi statuslu üzvü olaraq hər zaman yerli və beynəlxalq QHT-ləri əməkdaşlığa və düzgün təmsilçiliyə təşviq edir:
“Bu gün ölkəmizdə 14 QHT-nin ECOSOC-da məşvərətçi statusu vardır və onların bu statusu qazanmalarında azacıq da olsa bizim də rolumuz olub. Biz bu cür QHT-lərimizin sayını artırmaq üçün yaxşı və sistemli təşkilatlanmalı və daha çox çalışmalıyıq. Azərbaycan vətəndaş cəmiyyəti təşkilatları ölkədaxili uğurlu fəaliyyətlərini və öz güclərini beynəlxalq səviyyələrə daşımalı və bunun üçün birlik nümayiş etdirməlidirlər. Bu həm yerli, həm də xarici əlaqələrin qurulmasına aiddir. Nəticədə, QHT-lər arası çoxşaxəli əməkdaşlığın inkişafından həm cəmiyyət, həm dövlət, həm də vətəndaş qazanacaq. O zaman daha mütəşəkkil vətəndaş və cəmiyyət məfhumunun və vətəndaş cəmiyyətinin ən güclü tərəfinin birlikdə şahidi olacağıq”.
Oğuz
