“Məktəblərdə yoxlamalar davamlı aparılacaq. Məqsəd isə məktəblərə nizam-intizamın qaytarılmasıdır. Bu yoxlamalar iki istiqamətdə aparılır”.
Ednews xəbər verir ki, bunu "Yaşıl Artım" Gündəliyində Təhsil konfransında çıxışı zamanı Elm və Təhsil naziri Emin Əmrullayev deyib.
O bildirib ki, yoxlamaların birinci istiqaməti daha çox məktəblərə kömək etmək məqsədi daşıyır:
"Əsas odur ki məktəblərdə sənədlər, inzibati qaydalara uyğunluq yerində olsun. İkinci istiqamət üzrə monitorinq və yoxlamalar isə Nazirliyinin daxili nəzarət şöbəsi tərəfindən aparılır. Bu daha çox qəbuledilməz kateqoriyalardan olan ciddi qanun pozuntularını əhatə edən yoxlamalardır. Bu yoxlamalar davamlı olacaq.
Çalışırıq ki, Nazirliyin regional idarələri də bu yoxlamalarda yaxından iştirak etsinlər. Təbii ki, ölkədə fəaliyyət göstərən 4400 orta məktəbi eyni anda yoxlamaq və nəzarət etmək qeyri-mümkündür. Amma biz müəyyən alqoritm əsasında bu yoxlamaları həyata keçiririk ".
