“Söz azadlığı, söz haqqı demokratik quruluşların, cəmiyyətlərin, dövlətlərin, ölkələrin təməl prinsipidir. İnsanların söz haqqını, söz azadlığını tanımadan xoşbəxt cəmiyyət qurmaq qeyri-mümkündür. Vətəndaş cəmiyyəti hər kəsin öz fikirlərini sərbəst ifadə etdiyi zaman formalaşa bilir”.
Bu sözləri Beynəlxalq Avrasiya Mətbuat Fondunun prezidenti Umud Mirzəyev Ednews-a Ümumdünya Dünya Mətbuat Azadlığı Günü ilə bağlı fikir bildirərkən deyib.
Fond rəhbərinin sözlərinə görə, 1993-cü il dekabrın 20-də BMT Baş Məclisinin qərarı ilə mayın 3-ü Dünya Mətbuat Azadlığı Günü kimi hər il qeyd edilir:
“XX əsrin son onilliyində dünyada yaranmış siyasi reallıqları nəzərə alan müxtəlif ölkələrin jurnalistləri azad mətbuat prinsiplərinin maneəsiz yayılması və bəşəri bəlalara qarşı birgə mübarizənin zəruriliyini bildirib. Mətbuat azadlığı fikrin ifadə olunması üçün daha geniş azadlığın ayrılmaz tərkib hissəsidir. Fikir azadlığı hər bir insanın əzəli hüququ və bəşəri tərəqqinin əsaslarından biridir”.
U.Mirzəyev qeyd etdi ki, BAMF yarandığı gündən hər il Mətbuat Azadlığı Gününü özəl gün kimi qeyd edib.
“Həmkarlarımızla həmrəy olmağa çalışmışıq. Azərbaycanda da bu gün münasibətilə bir sıra tədbirlər keçirilir, dövlət qurumlarının və KİV-lərin nümayəndələri bu sahədə mövcud durumu və ölkə mətbuatının inkişafı yollarını müzakirə edirlər”.
U.Mirzəyev son olaraq jurnalistlərin hüquqlarının qorunmasının zəruriliyi barədə məlumatlılığı artırmağın, habelə münaqişələr haqqında obyektiv məlumatların yayılmasının, peşə fəaliyyətlərinin dəstəkləməsi üçün birlikdə çalışmaların həyata keçirilməsinin vahid platforma çərçivəsində həyata keçirilməsinin vacibliyini vurğulayıb.