“İqlim dəyişikliyi ilə əlaqədar Azərbaycanda içməli su məsələsi getdikcə aktuallaşıb. Təəssüf ki, qonşu Ermənistan Azərbaycana axan çaylara qəsdən zəhərli tullantılar buraxır. İçməli suyun təhlükəli kimyəvi tullantılarla çirklənməsi əhalinin qida təhlükəsizliyinə ciddi təhlükə yaradır”.
Ednews xəbər verir ki, bu sözləri martın 7-də Beynəlxalq Avrasiya Mətbuat Fondunun prezidentinin müşaviri Sahib Məmmədov BMT-nin İnsan Hüquqları Şurasında Qida hüququ üzrə Xüsusi Məruzəçi ilə interaktiv dialoqu zamanı çıxış edərkən deyib.
Onun sözlərinə görə, Oxçuçay çayının mənsəbi Ermənistanın dağ-mədən sənayesi tərəfindən ağır metallar və təhlükəli maddələrlə güclü şəkildə çirkləndirilir:
“Hazırda çayda çirklənmə səbəbindən su canlıları demək olar ki, mövcud deyil. Ermənistanın işğalı zamanı əvvəllər işğal olunmuş ərazilərdəki su mənbələri qəsdən çirkləndirilib, onların təbii axın sxemi dəyişdirilib. Nəticədə, keçmiş təmas xəttində yaşayan əhali qəsdən təmiz içməli sudan məhrum edilib. Bu acınacaqlı vəziyyət Avropa Şurası Parlament Assambleyasını 2016-cı il yanvarın 26-da “Azərbaycanın sərhədyanı rayonlarının sakinləri qəsdən sudan məhrum edilib” adlı qətnamə qəbul etməyə vadar edib”.
Əkbər
