Ermənistanda siyasi və dini dairələrdə gərginlik daha da dərinləşir.
“EDnews” xəbər verir ki, bu dəfə hədəfdə sıravi keşişlər yox, erməni kilsəsinin yüksək rütbəli ruhaniləri – arxiyepiskoplar dayanır. Son məlumatlara görə, hüquq-mühafizə orqanları tanınmış dini lider, Şirak yeparxiyasının rəhbəri arxiyepiskop Mikael Acapaxyanın iqamətgahında xüsusi əməliyyat keçiriblər.
Məlumatı Ermənistanın məşhur Telegram kanallarından biri – @bagramyan26 yayıb. Kanalın bildirdiyinə görə, hüquq-mühafizə orqanları Acapaxyanın yaşadığı binaya daxil olub və əməliyyat tədbirləri həyata keçirib. Rəsmi qurumlardan isə hələlik bu haqda açıqlama verilməyib.
Mikael Acapaxyan kimdir?
“EDnews” bildirir ki, Mikael Acapaxyan – 1963–1964-cü illərdə anadan olmuş, hazırda 61 yaşında olan nüfuzlu erməni ruhani rəhbəridir. O, Ermənistan Apostol Kilsəsinin Şirak bölgəsinə rəhbərlik edir və “arxiyepiskop” rütbəsi daşıyır. Acapaxyan Paşinyana münasibətdə sərt çıxışları ilə seçilir. O, Kilsənin dövlətə qarşı müqavimət göstərdiyi dövrlərdə dəfələrlə ön plana çıxmış, Paşinyan hakimiyyətini tənqid etmişdir.
Erməni qanunlarına görə, din xadimlərinin siyasi və ya hüquqi toxunulmazlığı yoxdur. Keçirilən əməliyyat göstərir ki, artıq Ermənistanın güc strukturları “kilsəyə toxunmaq olmaz” stereotipini dağıtmağa başlayıb. Bu isə cəmiyyətin müxtəlif təbəqələrində rezonans doğurur.
Xatırladaq ki, İrəvanda artıq bir neçə aydır “kilsəyə qarşı təzyiq kampaniyası” mövcuddur. Müxtəlif din xadimləri barəsində istintaqlar aparılır, bəzi keşişlərə qarşı cinayət işi açılıb, onlardan bəziləri həbs olunub. Proses artıq sadə ruhani şəxsləri deyil, erməni kilsəsinin “generalları” sayılan arxiyepiskopları da əhatə edir.
Acapaxyanın iqamətgahında keçirilən bu əməliyyat da bu zəncirin növbəti halqası kimi qiymətləndirilir. Məlumdur ki, Paşinyan hakimiyyəti ilə kilsə arasında münasibətlər son dərəcə gərgindir. Kilsənin siyasi bəyanatları, Katolikos II Qarekinlə mübahisələr, Samvel Karapetyanın həbsi və digər hadisələr bu gərginliyin açıq təzahürüdür.
Hələlik əməliyyatın səbəbi açıqlanmasa da, ehtimallara görə bu ya keçmiş bəyanatlara görə Acapaxyana qarşı təzyiq, ya da kilsənin maliyyə fəaliyyətinə dair istintaq çərçivəsində atılmış addım ola bilər. Hər iki halda, bu hadisə Ermənistanın siyasi-iqtisadi sferasında yeni bir böhranın qapısını aça bilər.
