"Mission: Impossible" (1966-73) serialının məşhur musiqisinin müəllifi Lalo Şifrin 93 yaşında vəfat edib.
“EDnews” xəbər verir ki, bu barədə "The Hollywood Reporter" jurnalı bəstəkarın oğluna istinadla məlumat yayıb.
Bildirilir ki, argentinaəsilli amerikalı bəstəkar pnevmoniyanın fəsadları nəticəsində dünyasını dəyişib.
Qeyd edək ki, Lalo Şifrin "Mission: Impossible" serialının musiqisini yaratmağın cəmi üç dəqiqəsini aldığını, özü də həmin melodiyanı serialın heç bir kadrını görmədən bəstələdiyini bildirmişdi.
Şifrin ümumilikdə 100-dən çox filmin və serialın musiqisini yazıb. Onun işləri arasında "Cool Hand Luke" (1967), "Enter the Dragon" (1973), "Planet of the Apes" (1974), həmçinin "Rush Hour" trilogiyası (1998, 2001, 2007) da yer alır.
Bəstəkar altı dəfə "Oskar" mükafatına namizəd olub və 2018-ci ildə kinoya görkəmli töhfəsinə görə fəxri "Oskar"la təltif edilib. O, həmçinin dörd dəfə "Qremmi" mükafatı qazanıb. 2016-cı ildə isə Los-Ancelesdəki Hollivud Şöhrət Xiyabanında adına ulduzla təltif olunub.
