Azərbaycanın müdafiə naziri general-polkovnik Zakir Həsənov 26 İyun - Silahlı Qüvvələr Günü münasibətilə Azərbaycan Ordusunun şəxsi heyətini təbrik edib.
EDnews xəbər verir ki, müdafiə naziri zabitləri, gizirləri, miçmanları, kursantları, çavuşları, əsgərləri, matrosları, dövlət qulluqçularını və mülki işçiləri bayram münasibətilə səmimi-qəlbdən təbrik edərək onlara Vətənə şərəfli xidmətdə uğurlar arzulayıb.
Zakir Həsənov bildirib ki, 26 iyun 1918-ci ildə yaradılan Əlahiddə Azərbaycan Korpusu Cümhuriyyət Ordusunun hüquqi bazasını təşkil edib. Ümummilli Lider Heydər Əliyevin 1998-ci il mayın 22-də imzaladığı Fərmanla həmin gün Azərbaycanda Silahlı Qüvvələr Günü kimi qeyd olunur.
Nazir qeyd edib ki, Prezident, Silahlı Qüvvələrin Ali Baş Komandanı İlham Əliyevin rəhbərliyi ilə ölkənin müdafiə qüdrətinin artırılması daim prioritet məsələ kimi diqqətdə saxlanılıb. Onun sözlərinə görə, Azərbaycan Ordusunun Vətən müharibəsində qazandığı qələbə və həyata keçirdiyi uğurlu antiterror əməliyyatı nəticəsində işğal altında olan torpaqlar azad edilib.
Müdafiə naziri vurğulayıb ki, bu gün Azərbaycan Ordusunun şəxsi heyəti işğaldan azad olunmuş ərazilərdə Vətənin keşiyində ayıq-sayıq dayanır və genişmiqyaslı bərpa-quruculuq işlərinə, eləcə də Böyük Qayıdış prosesinə öz töhfəsini verir.
Zakir Həsənov Azərbaycanın müstəqilliyi, ərazi bütövlüyü və suverenliyi uğrunda şəhid olan Vətən övladlarının xatirəsini dərin ehtiramla yad edib. O, şəhid ailələrinin, sağlamlığını itirmiş hərbi qulluqçuların və müharibə veteranlarının dövlət tərəfindən daim diqqət və qayğı ilə əhatə olunduğunu bildirib.
