Amerikalı reper Eminemin "Eight Mile Style" nəşriyyat şirkəti "Meta Platforms"a qarşı məhkəmə iddiası qaldırıb. "Meta" şirkəti ("Facebook", "Instagram" və "WhatsApp" platformalarının sahibi) müəllif hüquqlarını sistemli şəkildə pozmaqda ittiham olunur.
“EDnews” xəbər verir ki, bu barədə məlumatı "CBS News" yayıb.
Məhkəmə sənədlərinə əsasən, "Meta" Eminemin musiqi kataloqundan olan 243 mahnını icazəsiz olaraq saxlayıb, çoxaldıb və kommersiya məqsədilə istifadə edib. İddiada "Original Audio" və "Reels" funksiyalarına xüsusi diqqət çəkilir. "Eight Mile Style" bildirir ki, bu funksiyalar istifadəçilərə Eminemin musiqilərindən lisenziyasız və müəllif adı qeyd edilmədən videolar yaratmağa imkan verir və hətta bunu təşviq edir.
Şirkət müəllif hüquqlarının pozulması nəticəsində dəyər itkisi, itirilmiş gəlir və "Meta"nın bu musiqilərdən qazandığı gəlirin kompensasiya edilməsini tələb edir.
Alternativ olaraq, "Eight Mile Style" hər bir mahnı üçün ABŞ qanunvericiliyinə əsasən maksimum 150 000 dollar olmaqla, ümumilikdə 109 350 000 dollar məbləğində kompensasiya istəyir.
Qeyd edək ki, dünyada Eminem adı ilə tanınan Marşall Bryus Matherz III bütün dövrlərin ən uğurlu reperlərindən biridir. Onun 220 milyondan çox albomu satılıb, sənətçi 15 "Grammy" mükafatına layiq görülüb. "The Marshall Mathers LP" albomu ABŞ musiqi tarixində ən sürətlə satılan albomlardan biri hesab olunur.
Xatırladaq ki, bu, Eminemin müəllif hüquqları ilə bağlı ilk məhkəmə iddiası deyil. 2019-cu ildə də "Eight Mile Style" "Spotify"a qarşı müəllif hüquqlarının pozulması və musiqi lisenziyalaşdırılması ilə bağlı qanunun pozulması iddiası qaldırmışdı.
