ABŞ Federal Təhqiqat Bürosunun (FTB) Vaşinqton ştatının Lacey şəhərində həyata keçirdiyi əməliyyat nəticəsində müxtəlif növ silah-sursat, hərbi zirehli geyimlər, həmçinin nasist ideologiyasına aid atributlar aşkar edilmişdir. Bu barədə "New York Post" məlumat yayıb.
“EDnews” xəbər verir ki, törston dairəsinin şerifi Derek Sandersin bildirdiyinə görə, əməliyyat ABŞ Ordusunun Cinayət İstintaq İdarəsinin müraciəti əsasında 3 iyun 2025-ci il tarixində həyata keçirilmişdir. Əməliyyat, bir gün əvvəl — 2 iyun tarixində Lewis-McCord Birgə Hərbi Bazasında baş vermiş zorakı insident və hərbi təyinatlı silahların oğurlanması faktı ilə əlaqədar aparılan istintaq çərçivəsində həyata keçirilmişdir.
Reyd zamanı pulemyot, qumbaraatan və digər növ ağır silahlar, zirehli vasitələr, eləcə də nasist ideologiyasını təcəssüm etdirən materiallar aşkar olunmuşdur. Saxlanılan iki nəfər barəsində silah qanunvericiliyinin pozulması ilə bağlı araşdırmalar davam etdirilir. Onların nasist və ağdərili millətçi yönümlü fəaliyyətlərdə aktiv iştirak etdiyi müəyyən olunmuşdur. Məsələ ilə bağlı əlavə məlumatların istintaqın gedişindən asılı olaraq ictimaiyyətə təqdim ediləcəyi bildirilib.
