Azərbaycanın "Neftçi" klubu yeni mövsüm öncəsi heyətini gücləndirmək məqsədilə ilk transferini həyata keçirib.
Bu barədə EDnews məlumat yayıb.
Klub Benin millisinin dayaq yarımmüdafiəçisi Sessi D'Almeyda ilə müqavilə imzalayıb. 29 yaşlı futbolçu ilə 2+1 illik əməkdaşlıq nəzərdə tutulur. D'Almeyda artıq rəsmi olaraq "Neftçi"nin futbolçusudur və komandaya qoşulub.
Sessi Oktave Emile D'Almeyda futbol karyerasına Fransanın Bordo şəhərində başlayıb. Peşəkar debütünü də eyni şəhərin "Bordo" klubunda edib. 2015-ci ildə Parisin PSJ klubuna transfer olunmasına baxmayaraq, əsas heyətdə çox nadir oyun imkanı əldə edib və orada möhkəmlənə bilməyib. Daha sonra futbolçu İngiltərə Premyer Liqası və digər Avropa ölkələrindəki klublarda çıxış edib. Bunlara İngiltərənin "Börnli", "Blekpul", "Yeovil", Fransanın "Valensienn" və "Pau FC", Portuqaliyanın "Tondela" və Kiprin "Apollon Limassol" klubları daxildir.
Futbolçu həm Fransa, həm də Benin pasportuna malikdir və 2015-ci ildən Benin milli komandasının üzvüdür. Onun millidə 34 oyunu və 1 qolü var.
"Neftçi"nin bu transferi kluba həm təcrübə, həm də keyfiyyət baxımından güclü əlavə olacaq. D'Almeydanın əsas vəzifəsi komandada orta sahədə dayaq yarımmüdafiəçisi kimi çıxış etməkdir.
Fatimə Shukurova // EDnews
