Yaz aylarında ağacların çiçək açması, tozlanmanın başlanması və havada uçan toz hissəcikləri ilə əlaqədar allergik xəstəliklər yaranır və ya kəskinləşir.
Həkim-infeksionist Mərdan Əliyev Ednews-a açıqlamasında bildirir ki, allergiyalar immun sistemi ilə əlaqəli olan xəstəlikdir. Yəni immun sisteminin normal çalışmaması nəticəsində baş verir.
“Bunun mexanizmi necədir? Müəyyən maddələr var ki, buna allergenlər deyirik. Bu allergenlər orqanizmə daxil olduqda immun sistemimiz ona qarşı normadan daha yüksək dərəcədə cavab verir. Elə bilir ki, o bizim üçün təhlükəlidir. Amma reallıqda onun bizim üçün təhlükəsi yoxdur. İmmun sistemi normal olan şəxslərdə belə hallar baş vermir. Bu allergenlər əsasən bitki tozlarıdır. Çünki bu bitki tozları bizim üçün yüksək allergik xüsusiyyətə malikdir”.
Mütəxəssis qeyd edir ki, immun sisteminin normal çalışmaması nəticəsində allergik reaksiyalar müşahidə edilir. Allergik reaksiyalar iltihabi proseslərdir.
“Yəni o allergenlər yaz-yay aylarında bitki tozlarına qarşı xüsusi ilə müşahidə olunur. Həmin bitki tozları bizim orqanizmimizə tənəffüs yolları ilə daxil olur. Tənəffüs sistemində allergik reaksiyaları başladır. Bizim immun sistemimiz tərəfindən həmən bitki tozları təhlükəli bir maddə kimi qəbul edilir və iltihabi reaksiyalar başlayır. Beləliklə də bizdə allergik relit dediyimiz xəstəlik müşahidə edilir. Burun axma, asqırma və s. həmin allergenlərin daxil olduğu yerdən asılı olaraq da müxtəlif allergik proseslər baş verə bilər. Ən geniş yayılmış allergik renit zökəm əlamətləridir. Bu hətta kənardan qripə də oxşayır”.
İnfeksionist vurğulayır ki, bu xəstəliklər tam sağalan xəstəliklər deyil.
“Lakin dərmanlar vasitəsilə qarşısını almaq olar. Bəzi hallarda sağalma da mümkündür. Amma əksər hallarda sağalması yalnız dərman vasitəsilə mümkündür. Ən yaxşı vasitə isə həmin allergeni bilib onun orqanizmə daxil olmasının qarşısını almaqdır. Misal üçün əgər bitki tozlarına qarşı allergiyamız varsa həmin bitkidən uzaq durmalıyıq. Ya da maska taxmalıyıq. O allergen bizim tənəffüs sistemimizə daxil olmasın. Birdə xüsusi müalicə metodaları var. Müəyyən olunur ki, hansı allergenlərə qarşı bizim allergiyamız var. Həmin allergenləri az dozada orqanizmimizə edilir. Amma bu bir az daha uzun çəkir və çətin müalicə üsuludur".
Aynurə İsmayıl
