ABŞ və Azərbaycan arasında enerji sahəsində tərəfdaşlıq yeni mərhələyə qədəm qoyur. Bakı Enerji Həftəsi çərçivəsində ABŞ Dövlət Departamentinin baş müşaviri Uyatt Toehlke ilə SOCAR nümayəndələri arasında keçirilən görüşdə iki ölkə arasında enerji əməkdaşlığının perspektivləri müzakirə olunub.

Görüş zamanı tərəflər Cənubi Qafqaz regionunda və daha geniş coğrafiyada enerji təhlükəsizliyinin təmin olunmasında ABŞ-Azərbaycan əməkdaşlığının vacib rolunu vurğulayıblar. Uyatt Toehlke qeyd edib ki, “Ölkələrimiz arasında enerji məsələlərində güclü tərəfdaşlığa əsaslanmağa davam etmək Bakı Enerji Həftəsi kimi tədbirlərin uğurla keçirilməsinə və həm Cənubi Qafqazda, həm də ABŞ-da iqtisadi artımın və rifahın təmin olunmasına töhfə verir.”

ABŞ-ın Azərbaycandakı səfirliyi də bu görüşün əhəmiyyətini xüsusi qeyd edərək bildirib ki, enerji sahəsində əməkdaşlıq yalnız iqtisadi deyil, eyni zamanda geosiyasi sabitlik və tərəfdaşlıq üçün strateji əhəmiyyət daşıyır.

Qeyd edək ki, Bakı Enerji Həftəsi regionun ən mühüm beynəlxalq enerji platformalarından biridir və bu tədbir çərçivəsində dünyanın bir çox aparıcı şirkətləri, dövlət qurumları və beynəlxalq təşkilatlar arasında əməkdaşlıq əlaqələri genişləndirilir. ABŞ və Azərbaycanın enerji dialoqu da bu kontekstdə daha strateji xarakter almağa başlayır.

Ekspertlər hesab edirlər ki, bu cür yüksək səviyyəli təmaslar ABŞ-Azərbaycan enerji tərəfdaşlığını gücləndirməklə yanaşı, regionun enerji təhlükəsizliyinə və dayanıqlı inkişafına da mühüm töhfə verir.

Fatimə Şükürova // EDnews