Hazırda Azərbaycanın bir neçə məhsulunun Avropa İttifaqı (Aİ) ölkələrinə çıxışında 20 faizlik "yaşıl dəhliz"ə nail olunub. Digər tərəfdən Azərbaycanın akvakultura və dəri məhsullarının Avropa İttifaqı ölkələrinə ixracına icazə verilib. Hazırda Azərbaycanın istehsal etdiyi balıq və digər dəniz məhsullarının da həmin ölkələrə ixracının həyata keçirilməsi üçün işlər aparılır.
“EDnews” xəbər verir ki ,bunu Azərbaycan Respublikasının Qida Təhlükəsizliyi Agentliyinin sədr müavini Balarəhim Quliyev Bakıda IV Aqrobiznesin İnkişafı Forumunun "Azərbaycanda Aqrobiznesin İnkişafına Baxış" mövzusunda keçirilən yüksəksəviyyəli paneldə çıxışı zamanı deyib.
Onun sözlərinə görə, bundan əlavə aqrobiznes sahəsində işləyən sahibkarların məhsullarının Çin bazarlarına çıxarılması istiqamətində də işlər görülür: "Bir sıra görüşlər keçirilib, protokollar imzalanıb, qida təhlükəsizliyinin idarəetmə sistemləri haqqında Azərbaycandan Çinə çox böyük hesabat göndərilib. Hesabat qəbul olunub”, - deyə B.Quliyev bildirib.
Fatimə Mərdanlı //EDnews
