Azərbaycanın 500 min ton “yaşıl hidrogen” istehsalı üçün 9 giqavat əlavə bərpa olunan enerji gücünə ehtiyacı var.

“EDnews” xəbər verir ki,  bunu Energetika Nazirliyinin tabeliyindəki Bərpa Olunan Enerji Mənbələri Dövlət Agentliyinin direktor müavini Rəna Hümbətova Bakıda keçirilən 30-cu Yubiley Beynəlxalq Xəzər Neft və Qaz sərgisi və 13-cü Xəzər Beynəlxalq Energetika və Yaşıl Enerji beynəlxalq sərgisi çərçivəsində “Yaşıl enerji – Xəzər regionunda potensialının reallaşdırılması” panel müzakirəsində bildirib.

“Bu həcm həm daxili tələbatın ödənilməsi, həm də ixrac məqsədləri üçün nəzərdə tutulub. Bu kifayət qədər iri bir rəqəmdir, lakin Azərbaycanın enerji potensialını nəzərə alsaq, bu məqsədə çatmağın real olduğunu deyə bilərik”, - deyə R. Hümbətova qeyd edib.

Onun sözlərinə görə, 2027-ci ilə qədər Azərbaycanda quraşdırılmış bərpa olunan enerji gücünün ümumi enerji istehsalında payı təxminən 33 %-ə yüksələ bilər.

“Azərbaycan bərpa olunan enerji sahəsində geniş potensiala malikdir. 2027-ci ilədək ölkədə ümumilikdə 2 giqavatlıq bərpa olunan enerji gücünün istismara verilməsi planlaşdırılır. Bunların təxminən 1,5 giqavatı günəş enerjisi üzrə 8 layihəni əhatə edəcək. Bundan əlavə, 480 meqavat gücündə iki quruda yerləşən külək enerjisi layihəsi də nəzərdə tutulur. Mövcud inkişaf tempi davam edərsə, 2027-ci ilə qədər bərpa olunan enerjinin quraşdırılmış gücdəki payı 33 %-ə çata bilər. Halbuki, “Paris Sazişi” çərçivəsində Azərbaycanın 2030-cu ilədək öhdəliyi cəmi 30 % idi. Bu da ölkəmizin bu sahədəki real imkanlarını əyani şəkildə göstərir”, - deyə o bildirib.