Ailə, Qadın və Uşaq Problemləri üzrə Dövlət Komitəsinin sədri Bahar Muradova 1 iyun – Uşaqların Beynəlxalq Müdafiəsi Günü münasibətilə keçirilən “Səsim mənim, hüquqlarım mənim” adlı konfransda çıxış edərək, uşaqların hələ də mina təhlükəsi ilə üz-üzə olduğunu bildirib.

Muradova qeyd edib ki, Azərbaycan xalqı, o cümlədən uşaqlar uzun illər ərzində müharibə və münaqişə şəraitində yaşayıb:

“Bu gün də ölkəmizdə partlamamış hərbi sursatlar, xüsusilə də minalar, uşaqların həyat və sağlamlığı üçün ciddi təhlükə olaraq qalır.”
Komitə sədri vurğulayıb ki, Azərbaycan tərəfi Ermənistanla sülhə nail olmaq üçün bütün imkanlarını səfərbər edir və bu istiqamətdə səylər davam etdirilir.

Bahar Muradova həmçinin bildirib ki, Uşaqların hüquqlarının müdafiəsi üzrə 2026–2030-cu illər üçün Milli Fəaliyyət Planı hazırlanır:

“Bununla yanaşı, ailə konsepsiyası ilə bağlı sənəd və ‘Uşaq hüquqları haqqında’ qanun layihəsinə də yenidən baxılması nəzərdə tutulur.”
Muradovanın çıxışı uşaqların təhlükəsizliyi, hüquqları və rifahı sahəsində davamlı dövlət siyasətinin əhəmiyyətinə diqqət çəkməklə yekunlaşıb.

Fatimə Şükürova // EDnews