Azərbaycan Respublikasının Prezidenti İlham Əliyev mayın 27-də Laçın rayonunda inşa ediləcək yeni  layihənin – Laçın kanat yolunun təməlini qoyub.

EDnews xəbər verir ki, layihə barədə dövlət başçısına rəqəmsal inkişaf və nəqliyyat naziri Rəşad Nəbiyev ətraflı məlumat verib. Bildirilib ki, Laçının göz oxşayan təbiəti və sürətlə inkişaf edən turizm potensialı nəzərə alınaraq, bu bölgədə yeni turizm infrastrukturunun yaradılmasına xüsusi önəm verilir.

Laçın kanat yolu şəhərin Bulvar ərazisində salınacaq və iki hissədən ibarət olacaq. 300 metr hündürlükdən keçəcək kanat yolunun ümumi uzunluğu 1720 metr təşkil edir. Yalnız 6 dəqiqəyə bu məsafəni qət edəcək kabinələr Laçının ecazkar mənzərələrini göydən izləmək imkanı verəcək. Layihə çərçivəsində quraşdırılacaq 17 kabinə saatda 800 sərnişinə xidmət göstərə biləcək.

Kanat yolunun başlanğıc və son dayanacaqları yerləşəcək Bulvar ərazisi – uzunluğu 2 kilometrə yaxın olan bu məkan – hazırda həm yerli sakinlər, həm də turistlər üçün Laçının sevimli guşəsinə çevrilib. Bu layihə isə Bulvarın cəlbediciliyini daha da artıracaq, rayona axını gücləndirəcək.

Qeyd edək ki, işğaldan azad olunmasından sonra Laçında sosial və infrastruktur sahəsində bir çox mühüm layihələr həyata keçirilib. Xüsusilə turizm sektoruna göstərilən diqqət, rayonu gələcəkdə Azərbaycanın aparıcı turizm mərkəzlərindən birinə çevirməyə hesablanıb.

Yeni kanat yolu isə bu hədəfin reallaşmasında mühüm rol oynayacaq və Laçının göylərə yüksələn simvoluna çevriləcək.

Fatima Şükürova // EDnews