Fövqəladə Hallar Nazirliyi (FHN) ticarət obyektlərində yanğın təhlükəsizliyi qaydalarının pozulması hallarının hələ də davam etdiyini bildirərək, bu sahədə ciddi diqqət və məsuliyyət tələb olunduğunu vurğulayıb. Bu barədə EDnews məlumat verir.
Nazirliyin yaydığı müraciətdə qeyd olunur ki, aparılan maarifləndirici işlərə və nəzarət tədbirlərinə baxmayaraq, bəzi obyektlərdə qaydalara əməl olunmaması yanğın riski yaradır və nəticədə insan həyatı, sağlamlığı, eləcə də dövlət və şəxsi əmlak təhlükə altına düşə bilər.
FHN ticarət müəssisələrinin rəhbərləri və əməkdaşlarına müraciət edərək, yanğın təhlükəsizliyi qaydalarına ciddi əməl etməyə çağırır. Qurum həmçinin bu məqsədlə maarifləndirici videoçarx hazırlayıb və onu ictimaiyyətə təqdim edib. Videoçarxda ticarət sahəsində çalışanların gündəlik iş zamanı nələrə diqqət etməli olduqları aydın və sadə dillə izah olunub.
Nazirlik müraciətini bu çağırışla tamamlayıb:
“Unutmayın: Qaydalara biganəlik – həyatımıza təhlükədir! Təhlükə zamanı 112-yə zəng edin!”
Fatimə Şükürova // EDnews
