Abşeron rayonunda hüquq qaydalarının pozulması hallarına qarşı hüquq-mühafizə orqanları tərəfindən genişmiqyaslı əməliyyat-profilaktik tədbirlər həyata keçirilib.

Daxili İşlər Nazirliyinin Mətbuat Xidmətinin “EDnews”a verdiyi məlumata əsasən, Abşeron Rayon Polis İdarəsi və onun Saray, Mehdiabad, Qobu polis bölmələrinin əməkdaşlarının iştirakı ilə keçirilən əməliyyatlar çərçivəsində qanunsuz narkotik dövriyyəsinə dair 7 fakt müəyyən edilib.

Eyni zamanda, müxtəlif cinayət əməlləri ilə əlaqədar axtarışda olan 36 şəxs saxlanılıb, eləcə də 37 cinayətin üstü “isti izlərlə” açılıb.

Küçə ticarətinin qanunsuz təşkili, dilənçilik və avaralıq hallarına dair 136, xırda xuliqanlıq və kibercinayətlərə dair isə 43 hüquqpozma faktı qeydə alınıb. Vətəndaşlar tərəfindən könüllü şəkildə polisə müxtəlif növ odlu silah və sursatlar təhvil verilib.

Rayon ərazisində Dövlət Yol Polisi əməkdaşlarının keçirdiyi nəzarət tədbirləri zamanı nəqliyyat vasitələrini spirtli içki və ya narkotik maddənin təsiri altında idarə edən 2 sürücü aşkarlanıb. Bundan əlavə, avtomobilin konstruksiyasına qanunsuz müdaxilə edən 18, dayanma və durma qaydalarını pozan digər sürücülərə qarşı inzibati tədbirlər görülüb.

Abşeron rayonu üzrə ictimai təhlükəsizliyin təmin olunması istiqamətində belə tədbirlərin davam etdiriləcəyi bildirilib.

Şəms Qasımlı // EDnews