Yəməndə fəaliyyət göstərən “Ənsar Allah” hərəkatının silahlı qanadı olan husilər İsrailin Ben Qurion hava limanına raket zərbəsi endirdiklərini açıqlayıblar.
"EDnews" xəbər verir ki, bu barədə TASS agentliyi, husilərə yaxın “Əl-Məsirə” telekanalına istinadla məlumat yayıb.
Açıqlamada bildirilir ki, hücum hipersəs sürətinə malik ballistik raketlə həyata keçirilib və raket “işğal altındakı Yaffa məhəlləsində yerləşən Lod hava limanına” — yəni İsrailin əsas beynəlxalq hava limanı olan Ben Qurion aeroportuna yönəldilib.
Husilərin sözçüsü hücum nəticəsində hava limanının fəaliyyətini dayandırdığını bildirib. Onların iddiasına görə, bu əməliyyat İsrailin Qəzza zolağında həyata keçirdiyi hərbi əməliyyatlara cavab olaraq təşkil olunub.
Digər tərəfdən, İsrail Müdafiə Qüvvələri (IDF) ötən gün Yəmən ərazisindən İsrailə doğru atılan bir raketin ələ keçirildiyini açıqlayıb. Lakin rəsmi Tel-Əviv Ben Qurion hava limanının fəaliyyətinin dayandırılması ilə bağlı hər hansı təsdiq verməyib.
Bu hücum, husilərin İsrailə qarşı daha genişmiqyaslı və texnoloji cəhətdən inkişaf etmiş silahlardan istifadə etməyə başladığını göstərir. Ekspertlərin fikrincə, hipersəs raketlərinin istifadəsi bölgədəki təhlükəsizlik balansını dəyişə bilər.
Qeyd edək ki, husilər bundan öncə də İsrailə qarşı raket və pilotsuz uçuş aparatları ilə hücumlar təşkil etdiklərini iddia etmişdilər. Lakin bu, Ben Qurion hava limanı kimi yüksək strateji obyektə yönəlmiş ilk belə hücum kimi qiymətləndirilir.
Fatimə Şükürova // EDnews
