Fransa Malidən qovulanda yerli xalq çox sevinmişdi. Artıq hər şey qaydasına düşəcək, ölkədə təhlükəsizlik, əmin-amanlıq olacaq. Lakin, 60 ildə 35 dövlət çevrilişi və qiyama şahidlik edən malililərin ümidləri nəinki doğrulmadı, hətta daha betər günlər başladı.
2021-ci ildə gedənlərin yerini dolduran “Vaqner” qrupu malililərin ümidlərini puça çıxardı. Afrika mediası və nüfuzlu tədqiqat qruplarının araşdırması hərbiləşdirilmiş qrupun Malidə törətdiklərini gün üzünə çıxardı. Bəs “Vaqner”in Afrikada iş prinsipi necədir?
Nüfuzlu “Jeune Afrique” tədqiqat saytı “Vaqner”in iş metodunu belə xarakterizə edir: Rəsmi struktur yoxdur, sözçü yoxdur, heç kimin qarşısında hesabat verilmir. Belə bir şəraitdə həm cəzasızlıq mühiti bərqərar olur, həm də qrupun fəaliyyətini araşdırmaq müşkülə çevrilir.
Afrika mediasında belə bir ümumi fikir hakimdir: Malidə “Vaqner” barədə danışmağa heç kim cürət etmir. Danışan və yazanlar naməlum şəraitdə yoxa çıxır, ölü tapılır, ya da ən yaxşı halda ölümcül döyülür. Lakin “Vaqner”in həbsxanalarından qurtulan malililərin etirafları dəhşətləri üzə çıxarmağa imkan verir. “Forbiggen Stories” qrupunun araşdırması zamanı adı gizli saxlanan şəxslərin etirafları qan dondurur.
Etiraflardan görünür ki, “Vaqner”in toruna düşmək üçün cinayət törətməyə ehtiyac yoxdur. 6 baza vasitəsilə ölkənin yarısına nəzarət edən qurum kimdən xoşu gəlməsə, yaxud kiminsə bir qədər maddi imkanı varsa onu “cihadçı” və ya “cihada dəstək” bəhanəsi ilə həbs edərək özünün həbsxanalarına gətirib. Burada insanlar soyundurulur, “duş qəbul etdirilir”, sonra isə dindirmə başlayır. Rus musiqisinin sədaları altında dindirmə işgəncə xarakteri daşıyır: döyülmə, dağlama, kürəyə qaynar kərpic qoyma və s. Heç bir həbs sənədləşdirilmir, sərbəst buraxılanlara isə bu barədə danışmamaları üçün hədə-qorxu gəlinir (vaxtilə SSRİ-də də hansısa texnogen qəza, yaxud xoşagəlməz hadisənin şahidlərindən gördüklərini 25 il ərzində danışmamaq barədə iltizam alınırdı – müəl.). Bu fəaliyyət prinsip etibarı ilə Rusiya Federasiyasında güc strukturlarının iş metodları ilə eyniyyət təşkil edir.
“Vaqner”in ilk böyük “uğuru” 2022-ci ilin martındakı Mura qırğını oldu. 3 gün ərzində 10 min nəfərin yaşadığı məntəqədə əməliyyat zamanı “cihadçı” adı ilə 600-dək təqsirsiz mülki şəxs öldürüldü. Faktı BMT-nin missiyası da təsdiq edib. Qrup Maliyə ayaq basdıqdan sonra onlarla kəndi xəritədən silib. Hamısına da “terrorçu” damğası vurularaq.
Bu Qurban bayramında da malililərin sevinci uzun çəkmədi. Onlar bayram günü “Vaqner”in ölkədən çıxması xəbərini Allahın lütfü kimi qəbul etdilər. Bir gün sonra isə onu Vaqnerin törəməsi “Africa Corps” əvəzlədi.
Belə görünür ki, fransız kolonializmindən azad olan malililər bu dəfə başqa bir “ağa”nın nəzarəti altına düşdülər. Həm də daha pis formada və qeyri-müəyyən müddətə.
Mənbə: "AZƏRTAC"
