Texnologiya dünyasının ən nüfuzlu simalarından biri olan İlon Mask süni intellekt, kosmos tədqiqatları və elektrikli nəqliyyat sahəsində inqilabi layihələrə rəhbərlik etsə də, Şimali Kaliforniyada davam edən məhkəmə işində onun texnologiya ilə gündəlik təmasına dair diqqətçəkən bir iddia ortaya çıxıb: Maskın kompüter istifadə etmədiyi bildirilib.
“EDnews” xəbər verir ki, bu qeyri-adi məlumat İlon Mask ilə "OpenAI" arasında süni intellektin gələcəyinə təsir göstərə biləcək davam edən hüquqi mübahisə çərçivəsində məhkəməyə təqdim olunan sənədlərdə yer alıb. Məhkəmə işi korporativ sirrlər, investisiya münasibətləri və şirkətin missiyası kimi ciddi mövzular ətrafında cərəyan edir. Lakin 22 iyun tarixində təqdim edilən üç səhifəlik sənədin ilk səhifəsindəki "Cənab Mask kompüter istifadə etmir" ifadəsi geniş müzakirəyə səbəb olub.
Məlumdur ki, İlon Mask sosial media platforması "X”də (keçmiş "Twitter”) olduqca aktivdir və əvvəllər dəfələrlə kompüter istifadə etdiyini açıq şəkildə bəyan edib. O, 2024-cü ildə "Starlink"in təyyarələr üçün Wi-Fi sistemi ilə bağlı sınaqlar zamanı dizüstü kompüterdən istifadə etdiyini bildirib. 2025-ci ildə isə bir izləyicisinin sualına cavab olaraq DOGE çıxartmalı köhnə noutbuk istifadə etdiyini etiraf etmişdi.
Bu faktlar Maskın rəqəmsal texnologiyalarla birbaşa ünsiyyətdə olduğunu sübut edir. Bu səbəbdən, vəkillərin "kompüter istifadə etmir” müdafiəsi hüquqi baxımdan məntiqli görünsə də, praktiki reallıqla ziddiyyət təşkil edir.
Məlum olduğu kimi, İlon Mask və "OpenAI" arasında sənəd paylaşımı ilə bağlı ciddi gərginlik yaşanır. Mask, "OpenAI" rəhbəri Sem Altmanı təşkilatın ilkin missiyasını tərk etməkdə ittiham edir. "OpenAI" isə Maskı şirkətdən ayrıldıqdan sonra belə müdaxilə etməyə çalışan keçmiş ortaqlardan biri kimi təqdim edir.
"Maskın şəxsi kompüteri yoxdursa, ondan istənilən sənədlərin təqdim edilməsi texniki olaraq mümkün deyil” arqumenti ilə "kompüter istifadə etmir” ifadəsinin hüquqi taktika olduğu ehtimal edilir.
Dava davam etdikcə bu iddianın sadəcə bir hüquqi manevr, yoxsa fərqli məna daşıyan real vəziyyət olub-olmadığı daha aydın şəkildə ortaya çıxacaq. Lakin hazırda texnologiya aləminin ən görkəmli fiqurlarından birinin "kompüter istifadə etmirəm” açıqlaması ictimaiyyət və hüquq dairələrində çaşqınlıq doğurmağa davam edir.
