Çin Xalq Respublikasının hakimiyyət orqanları ABŞ-nin son iqtisadi qərarlarını tənqid edərək, onları Vaşinqton və Pekin arasında əldə olunmuş razılaşmaları pozmaqda ittiham ediblər. Çin Ticarət Nazirliyi bildirib ki, ABŞ-nin çiplərin ixracına nəzarət üzrə yeni qaydaları və çinli tələbələrə viza məhdudiyyətləri ilə bağlı atdığı addımlar ikitərəfli münasibətlərə zərbə vurur və Çinin maraqlarına xələl gətirir.

"ABŞ birtərəfli qaydada yeni iqtisadi və ticarət mübahisələrinə səbəb olub və bununla da ikitərəfli iqtisadi və ticarət əlaqələrinin qeyri-müəyyənliyini və qeyri-sabitliyini dərinləşdirib", – deyə Ticarət Nazirliyinin bəyanatında qeyd olunub.

Nazirlik, həmçinin vurğulayıb ki, bu hərəkətlər mayın 12-də Cenevrədə keçirilmiş yüksək səviyyəli iqtisadi danışıqlar zamanı əldə olunmuş konsensusa açıq-aşkar ziddir. Həmin görüşdə Çin və ABŞ nümayəndə heyətləri bir sıra qarşılıqlı güzəşt əsasında razılığa gəlmiş, nəticələr həm Çin Dövlət Şurası, həm də Ağ Ev tərəfindən müsbət qarşılanmışdı.

“Associated Press” agentliyinin məlumatına əsasən, həmin danışıqlardan sonra ABŞ tərəfi keçmiş prezident Donald Trampın tətbiq etdiyi 145%-lik rüsumları 30%-ə endirməyə razılaşıb. Çin isə cavab olaraq, ABŞ mallarına tətbiq olunan rüsumları 125%-dən 10%-ə qədər azaltmağa söz verib.

Ticarət Nazirliyi bildirib ki, Çin tərəfi öz öhdəliklərinə sadiq qalıb, lakin ABŞ bu razılaşmaları pozmaqla etibarsız tərəfdaş təsiri bağışlayır. Rəsmi Pekin bəyan edib ki, əgər bu cür pozuntular davam edərsə, "qətiyyətli cavab tədbirləri" görüləcək.

Bu açıqlama ABŞ-Çin münasibətlərində növbəti gərginlik dalğasının başlandığını göstərir və xüsusilə yüksək texnologiyalar və təhsil sahəsindəki məhdudiyyətlər iki ölkə arasında strateji rəqabəti daha da dərinləşdirə bilər.

 
Fatimə Şükürova // EDnews