Rusiya artıq məhv edilmiş və ya zədələnmiş strateji bombardmançı və raket daşıyıcı təyyarələrinin itkisini kompensasiya edə bilməyəcək.

EDnews xəbər verir ki, bu barədə ukraynalı hərbi ekspert Aleksandr Kovalenko yerli mediaya açıqlamasında bildirib.

Ekspertin sözlərinə görə, Tu-95MS, Tu-22M3 və Tu-160 kimi strateji bombardmançı təyyarələr Rusiyada hal-hazırda istehsal olunmur və "yeni" adı ilə təqdim edilənlər əslində sovet dövründən qalan ehtiyat təyyarələrin modernləşdirilmiş versiyalarıdır:

“Bu günə qədər Rusiya sıfırdan nə Tu-22M3, nə də Tu-160 təyyarəsi istehsal edib. Onlar sadəcə SSRİ dövründən qalan hava donanmasını təmir və modernləşdirmə yolu ilə saxlamağa çalışırlar. İtkiləri əvəzləmək real deyil, çünki yeni istehsal yoxdur. Xüsusilə Tu-160-ların sıradan çıxarılması Rusiya üçün ciddi strateji və maliyyə zərbəsidir – bu təyyarələr Aerokosmik Qüvvələrin ən bahalı və nadir texnikaları sayılır”.

Aleksandr Kovalenko əlavə edib ki, Rusiya aviasiyasındakı itkilər davam edəcək və yaxın vaxtlarda daha da sarsıdıcı xəbərlər yayılacaq:

“A-50 havadan erkən xəbərdarlıq təyyarəsinin vurulması Rusiya üçün sonuncu unikal texnika itkisi olmayacaq. Tezliklə daha çox fantastik və gözlənilməz məlumatlar eşidəcəyik”.

Fatimə Şükürova // EDnews