Birləşmiş Millətlər Təşkilatı əsas departamentlərin birləşdirilməsini və resursların yenidən bölüşdürülməsini nəzərdə tutan köklü restrukturizasiyanı nəzərdən keçirir.

“EDnews” xəbər verir ki, bu barədə BMT-nin baş katibi Antonio Quterreşin rəhbərlik etdiyi işçi qrupunun hazırladığı məxfi altı səhifəlik memoranduma istinadən Reuters agentliyi məlumat yayıb.

Sənəd onlarla agentliyin dörd əsas sahə üzrə birləşdirilməsini təklif edir: sülh və təhlükəsizlik, humanitar məsələlər, davamlı inkişaf və insan hüquqları.

Xüsusi tədbirlərə Ümumdünya Ərzaq Proqramı (ÜƏP), UNICEF, ÜST və BMT QAK-ın əməliyyat strukturlarının vahid humanitar qurumda birləşdirilməsi daxildir. İslahat həmçinin bir sıra işçilərin Cenevrə və Nyu-Yorkdan daha ucuz şəhərlərə köçürülməsi də daxil olmaqla, işçilərin ixtisarını əhatə edir.

Təşəbbüs BMT-nin maliyyə böhranı ilə əlaqələndirilir. Belə ki, təşkilatın əsas donoru olan ABŞ-nin müntəzəm büdcəyə 1,5 milyard dollar, sülhməramlı əməliyyatlara isə 1,2 milyard dollar borcu var.

Amerika yardımının azaldılması artıq Humanitar Məsələlər İdarəsinin əməkdaşlarının 20%-nin işdən çıxarılmasına gətirib çıxarıb və Beynəlxalq Miqrasiya Təşkilatında 6 000 iş yerini ixtisara düşə bilər.

Quterreş islahatı parçalanmış strukturlara və bürokratiyaya cavab kimi qiymətləndirib, lakin BMT-nin yüzlərlə əməkdaşı mayın 1-də Cenevrədə ixtisarlara etiraz edib. Yekun restrukturizasiya təklifləri mayın 16-dək təqdim edilməlidir.

Fevralın 4-də ABŞ prezidenti Donald Tramp ölkəsinin BMT-nin İnsan Haqları Şurasından və BMT-nin Yaxın Şərqdəki Fələstin Qaçqınlarına Yardım və İşlər üzrə Agentliyindən çıxarılması haqqında sərəncam imzalayıb. Amerika lideri hesab edir ki, BMT o qədər də yaxşı idarə olunmur.

Fatimə Mərdanlı//EDnews