Bu il dünya smartfon tədarükü 6,2 % artaraq 1,24 milyard ədədə çatacaq.
“EDnews” xarici mətbuata istinadən xəbər verir ki, bu barədə “International Data Corporation” (IDC) beynəlxalq təhlil və konsaltinq şirkətinin hesabatında deyilir.
Son artım proqnozu daha əvvəlkini (5,8 % və ya 1,23 milyard ədəd) üstələyir. Proqnozun yaxşılaşması 2024-cü ilin üçüncü rübündə qlobal bazarın 3,2 % artması ilə əlaqədardır. 2023-2028-ci illər arasında qlobal smartfon bazarının orta illik artım tempi 2,6 % səviyyəsində gözlənilir.
IDC həmçinin generativ süni intellektin (Sİ) sənayenin inkişafına təsirini qeyd edir. IDC-nin tədqiqat direktoru Nabila Popalın sözlərinə görə, bu texnologiya hələ tələbata əhəmiyyətli təsir göstərmir.
"Biz gözləyirik ki, Sİ dəstəyi əvvəlcə premium flaqman cihazlarda görünəcək və 2028-ci ilə qədər Sİ inteqrasiyası olan smartfonların payı bazarın 70 %-nə çatacaq", - deyə o əlavə edib.
2024-cü ildə Android əsaslı smartfonların satışı 7,6 % artacaq, iOS cihazlarının satışı isə Apple-ın ABŞ, Çin və Avropa da daxil olmaqla əsas bazarlarda üzləşdiyi çətinliklər səbəbindən cəmi 0,4 % artacaq.
2025-ci ildə iPhone satışlarının artım tempinin 3,1 %-ə qədər sürətlənəcəyi, Android cihazlarının isə 1,7 %-ə qədər yavaşlayacağı proqnozlaşdırılır.
