Türkiyənin xarici işlər naziri Hakan Fidan Ukraynada sülh prosesinə dair danışıqların gələcəkdə yüksək səviyyəyə – dövlət başçıları səviyyəsinə keçəcəyinə inandığını bildirib. O, bu fikirlərini TRT Haber telekanalına açıqlamasında səsləndirib.

Nazir qeyd edib ki, liderlərin bir araya gəlməsi üçün öncə nümayəndə heyətləri arasında razılaşdırılmış qərarlar olmalı və bu qərarlar müəyyən yetkinlik mərhələsinə çatdırılmalıdır:

"Liderlərin bir araya gəlməsi üçün bu görüşə müəyyən qərarlar hazırlanmalı, nümayəndə heyətlərinin danışıqları müəyyən məqama çatmalıdır. Yəni, belə bir sammit üçün əvvəlcədən müəyyən gündəm hazırlanmalıdır."
Nazir əlavə edib ki, bu, onun şəxsi təhlilidir və tərəflər adından danışmağın doğru olmadığını da vurğulayıb. Onun sözlərinə görə, mövcud dinamika göstərir ki, əlavə danışıqlar və nümayəndə heyətləri səviyyəsində görüşlərdən sonra liderlərin zirvə görüşü qaçılmaz olacaq.

Fidan eyni zamanda xatırladıb ki, Türkiyə Prezidenti Rəcəb Tayyib Ərdoğan daha əvvəl həm Rusiya, həm də Ukrayna liderlərini sülh danışıqları üçün qəbul etməyə hazır olduğunu bəyan etmişdi. Nazir bildirib ki, ötən həftə Moskva və Kiyevə etdiyi səfərlərdə Prezident Vladimir Putin və Vladimir Zelenskiyə bu dəvəti çatdırıb.

İyunun 2-də İstanbulda baş tutmuş son görüş barədə danışan Hakan Fidan bildirib ki, həmin danışıqlarda tərəflər əsirlərin və xəstələrin mübadiləsi ilə bağlı əhəmiyyətli razılaşmalar əldə ediblər:

"Tərəflər görüşə yaxşı hazırlıqla gəliblər və müəyyən nəticələr əldə etmək əzmində idilər. Mən hesab edirəm ki, iyunun 2-də keçirilən görüş danışıqların əvvəlki raundunda razılaşdırılanların həyata keçirilməsi baxımından irəliləyiş əldə etdi. Ona görə də biz daha bir görüşün keçiriləcəyini gözləyirik."
Türkiyə rəsmisinin sözlərinə görə, Ankara Moskva və Kiyevin İstanbul görüşündən sonra növbəti danışıqlar raundunu davam etdirəcəyinə ümid edir.

Fatimə Şükürova // EDnews