Cənubi Qafqazda sülh və sabitliyə dair çağırışlar fonunda ABŞ Senatının Xarici Əlaqələr Komitəsinin üzvü, senator Stiv Deyns rəsmi Vaşinqtonun Azərbaycan və Ermənistan arasında sülh sazişinin imzalanmasına dəstəyini bir daha vurğulayıb.

EDnews xəbər verir ki, Stiv Deyns Ermənistana səfəri çərçivəsində ölkənin baş naziri Nikol Paşinyanla görüş keçirib. Görüş zamanı regional təhlükəsizlik, iqtisadi əməkdaşlıq və sərmayə imkanları müzakirə olunub.

ABŞ-ın Ermənistandakı səfirliyi görüş barədə X (keçmiş Twitter) sosial platformasında paylaşım edərək bildirib:

“ABŞ Senatının Xarici Əlaqələr Komitəsinin üzvü, senator Stiv Deyns Ermənistanın baş naziri Nikol Paşinyanla görüşüb. Senator Deyns regional təhlükəsizlik məsələlərini və iqtisadi sərmayə imkanlarını müzakirə edib. O, Tramp Administrasiyasının Ermənistan və Azərbaycanın regiona sabitlik və firavanlıq gətirmək üçün sülh sazişi imzalaması barədə mövqeyini dəstəklədiyini bildirib.”
Senatorun açıqlamasına görə, ABŞ bu sülh sazişini yalnız ikitərəfli münasibətlər baxımından deyil, Cənubi Qafqazda uzunmüddətli sabitlik və inkişaf üçün əsas addımlardan biri kimi qiymətləndirir.

Qeyd edək ki, ABŞ administrasiyası son illərdə Bakı və Yerevan arasında normallaşma prosesinə fəal diplomatik dəstək verir və bu istiqamətdə bir neçə dəfə tərəfləri Vaşinqtonda danışıqlara dəvət edib.

Fatimə Şükürova // EDnews