Azərbaycanın dini-mənəvi həyatında əlamətdar hadisələrdən biri baş verib. Dini Qurumlarla İş üzrə Dövlət Komitəsinin və Mənəvi Dəyərlərin Təbliği Fondunun təşkilatçılığı ilə Türkiyə və Gürcüstandan olan tanınmış din xadimləri Azərbaycana rəsmi səfərə gəliblər. Səfərin əsas məqsədi Azərbaycanla dost və qardaş ölkələr arasında dini-mənəvi əlaqələrin daha da inkişaf etdirilməsi, habelə regionda sülh və tolerantlıq mesajlarının yayılmasıdır.

Səfər çərçivəsində nümayəndə heyəti 31 may tarixində Azərbaycanın mədəniyyət paytaxtı olan Şuşa şəhərinə yollanıb. Qonaqlar burada bir sıra tarixi və dini abidələri ziyarət ediblər. Onlar Yuxarı Gövhər Ağa, Aşağı Gövhər Ağa və Saatlı məscidləri ilə tanış olub, Cıdır düzü kimi milli-mədəni əhəmiyyətə malik məkanları da ziyarət ediblər. Səfər zamanı qonaqlara Şuşanın tarixi, Qarabağ münaqişəsi zamanı şəhərə vurulan ziyan və aparılan bərpa işləri barədə ətraflı məlumat verilib.

Din xadimləri Azərbaycan xalqının multikultural dəyərlərə sadiqliyini, fərqli dini və etnik qrupların dinc birgəyaşayışını yüksək qiymətləndiriblər. Onlar, həmçinin, Şuşanın azad olunmasından sonra burada həyata keçirilən quruculuq və bərpa işlərini təqdir ediblər.

Qeyd edək ki, Şuşaya təşkil olunan bu səfərdə 30-dan çox azərbaycanlı din xadimi də iştirak edir. Səfər iyunun 2-dək davam edəcək və bu müddət ərzində müxtəlif dini və mənəvi mövzularda müzakirələr, konfranslar və görüşlər planlaşdırılıb. Belə təşəbbüslər dini dialoqun möhkəmlənməsinə və regionda sülh çağırışlarının güclənməsinə xidmət edir.

Fatimə Şükürova // EDnews